Jaggareddy Sangareddy Municipal Election Campaign : రాజకీయాల్లో తనకంటూ ఒక ప్రత్యేక శైలిని ఏర్పరుచుకున్న సీనియర్ నాయకుడు, మాజీ ఎమ్మెల్యే జగ్గారెడ్డి సంగారెడ్డి పురపాలక ఎన్నికల వేళ ప్రచారాన్ని హోరెత్తించారు. పట్టణంలోని 38 వార్డుల్లో కాంగ్రెస్ జెండా ఎగురవేడమే లక్ష్యంగా 15 వేల మందితో నిర్వహించిన ముఖాముఖి సభలో ఆయన చేసిన వ్యాఖ్యలు ఇప్పుడు రాజకీయ వర్గాల్లో హాట్ టాపిక్ గా మారాయి. “నేను రోజు పాలిచ్చే ఆవును.. నన్ను కాపాడుకోవాల్సిన బాధ్యత మీదే” అంటూ ఆయన వేసిన భావోద్వేగపూరిత అస్త్రం ఓటర్లను ఆలోచింపజేస్తోంది. ఇంతకీ జగ్గారెడ్డి వ్యూహం ఏమిటి..? సంగారెడ్డి రూపురేఖలు మార్చేందుకు ఆయన వద్ద ఉన్న ప్రణాళికలేంటి..?
అభివృద్ధి మంత్రం.. వార్డుకు 8 కోట్లు : సంగారెడ్డి మున్సిపాలిటీని ఆదర్శవంతంగా తీర్చిదిద్దేందుకు జగ్గారెడ్డి భారీ హామీని ప్రకటించారు. మున్సిపాలిటీలోని మొత్తం 38 వార్డుల్లో కాంగ్రెస్ అభ్యర్థులను గెలిపిస్తే, ముఖ్యమంత్రి రేవంత్ రెడ్డితో మాట్లాడి వార్డుకు రూ.8 కోట్ల చొప్పున మొత్తం రూ.300 కోట్లు తీసుకువస్తానని స్పష్టం చేశారు. “జగ్గారెడ్డి మాటంటే మాటే.. అభివృద్ధి విషయంలో వెనకడుగు వేసే ప్రసక్తే లేదు” అని ఆయన భరోసా ఇచ్చారు. అధికారంలో ఉన్న కాంగ్రెస్ పార్టీ కౌన్సిలర్లు ఉంటేనే పనులు వేగంగా జరుగుతాయని, ప్రజలు సరైన నిర్ణయం తీసుకోవాలని కోరారు.
ఇళ్ల స్థలాల కల సాకారం: 80 గజాల పంపిణీ : గత ప్రభుత్వ వైఫల్యాలను ఎండగడుతూ.. 2013లో తాను పంపిణీ చేసిన 5500 ఇళ్ల స్థలాల సర్టిఫికెట్లకు బీఆర్ఎస్ హయాంలో పొజిషన్ ఇవ్వలేదని జగ్గారెడ్డి విమర్శించారు. ఇప్పుడు కాంగ్రెస్ అధికారంలో ఉంది కాబట్టి, పాత లబ్ధిదారులతో పాటు కొత్తగా దరఖాస్తు చేసుకున్న అర్హులకు కూడా 80 గజాల చొప్పున స్థలాలు ఇప్పిస్తానని హామీ ఇచ్చారు. ఈ విషయంపై ఇప్పటికే సిఎం రేవంత్ రెడ్డి, రెవెన్యూ మంత్రి పొంగులేటి శ్రీనివాసరెడ్డితో చర్చించినట్లు ఆయన వెల్లడించారు.
ఆసక్తికరమైన ఉపమానాలు: ‘ఆవు – మేత’ సోపతి : తన రాజకీయ శైలిని వివరిస్తూ జగ్గారెడ్డి ఆసక్తికరమైన పోలికలు వాడారు. “నేను మీకు రోజు పాలిచ్చే ఆవు వంటివాడిని. ఐదేళ్లకోసారి వచ్చే వారిని నమ్ముతారా.. నిత్యం మీ మధ్య ఉండే నన్ను కాపాడుకుంటారా?” అని ప్రశ్నించారు. అయితే, “ఆవుకు మేత దొరక్కపోతే పాలు ఇవ్వదు.. నా దగ్గర మేత (అధికారం/బలం) లేకపోతే నేను పనులు ఎలా చేయిస్తాను?” అంటూ మున్సిపల్ ఎన్నికల్లో కాంగ్రెస్ గెలుపు ఆవశ్యకతను వివరించారు. అలాగే, “తాళం అత్త దగ్గర ఉంచి కోడలిని వంట చేయమంటే ఎలా కుదురుతుంది?” అంటూ ప్రతిపక్ష కౌన్సిలర్లు ఉంటే అభివృద్ధి కుంటుపడుతుందని ఉదహరించారు.
సంక్షేమ పథకాలు – ప్రతిపక్షాల రాద్ధాంతం : కాంగ్రెస్ ప్రభుత్వం ప్రవేశపెట్టిన ఉచిత బస్సు ప్రయాణం, ఉచిత విద్యుత్, ఆరోగ్యశ్రీ, ఇందిరమ్మ ఇళ్లు వంటి పథకాలు విజయవంతంగా అమలు అవుతున్నాయని జగ్గారెడ్డి పేర్కొన్నారు. బస్సుల్లో రద్దీపై స్పందిస్తూ.. “60 సీట్లు ఉన్న చోట 100 మంది ఎక్కితే చిన్న చిన్న గొడవలు సహజం, దాన్ని ప్రతిపక్షాలు కావాలనే రాద్ధాంతం చేస్తున్నాయి” అని కొట్టిపారేశారు. రాష్ట్ర ఆర్థిక పరిస్థితి ఇబ్బందికరంగా ఉన్నప్పటికీ, రాహుల్ గాంధీ మార్గదర్శకత్వంలో ప్రభుత్వం అడుగులు వేస్తోందని సమర్థించుకున్నారు.
వ్యూహాత్మక మార్పు: రాష్ట్ర రాజకీయాలపై కన్ను : రాబోయే రోజుల్లో తన భార్య నిర్మల సంగారెడ్డి నుంచి ఎమ్మెల్యేగా పోటీ చేస్తారని, తాను తెలంగాణ వ్యాప్తంగా పర్యటించి పార్టీ బలోపేతానికి కృషి చేస్తానని జగ్గారెడ్డి తన భవిష్యత్ కార్యాచరణను ప్రకటించారు. ఎమ్మెల్యేగా లేకున్నా తన పరపతితో పనులు చేయిస్తున్నానని, భవిష్యత్తులో సంగారెడ్డిని అభివృద్ధిలో అగ్రగామిగా నిలుపుతానని ఆయన ప్రసంగాన్ని ముగించారు.