konda surekha resignation rumors : తెలంగాణ కాంగ్రెస్ రాజకీయాల్లో గత కొద్ది రోజులుగా రేగుతున్న తుపాను ఇప్పుడు దేశ రాజధాని హస్తిన గడపను తాకింది. మంత్రి కొండా సురేఖ భవితవ్యంపై అధికార పార్టీ వర్గాల్లో తీవ్ర ఉత్కంఠ నెలకొన్న వేళ, ఆమె స్వయంగా దిల్లీ వేదికగా చేసిన వ్యాఖ్యలు రాష్ట్ర రాజకీయాల్లో పెను దుమారం రేపుతున్నాయి. ఒకవైపు క్రమశిక్షణా చర్యల కత్తి వేలాడుతుండగా, మరోవైపు “నాకో న్యాయం.. ఇతరులకో న్యాయమా?” అంటూ ఆమె సంధించిన ప్రశ్నలు అధిష్ఠానాన్ని సైతం ఆత్మరక్షణలో పడేశాయి.
నన్ను రాజీనామా అడగలేదు: మంత్రి కొండా సురేఖ స్పష్టీకరణ : దిల్లీ పర్యటనలో ఉన్న రాష్ట్ర అటవీ, దేవాదాయ శాఖ మంత్రి కొండా సురేఖ మీడియాతో చిట్చాట్గా మాట్లాడుతూ పలు కీలక అంశాలను వెల్లడించారు. తనను మంత్రి పదవికి రాజీనామా చేయాలని అధిష్ఠానం గానీ, పార్టీ పెద్దలు గానీ ఇప్పటివరకు కోరలేదని స్పష్టం చేశారు. అధిష్ఠానం ఎలాంటి నిర్ణయం తీసుకుంటుందోనని తాను వేచి చూస్తున్నట్లు పేర్కొన్నారు.
ఏఐసీసీ అధ్యక్షుడు మల్లికార్జున ఖర్గేను ఇప్పటికే కలిసి తాజా పరిణామాలపై చర్చించినట్లు సురేఖ తెలిపారు. అన్ని అంశాలను సమగ్రంగా పరిశీలించాలని ఆయనను కోరినట్లు వెల్లడించారు. పార్టీ రాష్ట్ర వ్యవహారాల ఇన్ఛార్జ్ కేసీ వేణుగోపాల్తో ఇంకా మాట్లాడాల్సి ఉందని, జరుగుతున్న వ్యవహారాలన్నింటిపై ఏఐసీసీ అగ్రనేతలు రాహుల్ గాంధీ, ప్రియాంక గాంధీలతో పాటు ఖర్గేకు సైతం రాతపూర్వకంగా పూర్తి వివరాలను నివేదించినట్లు వివరించారు.
‘బీసీనైన నాకో న్యాయం.. ఇతరులకో న్యాయమా?’ : ఈ సందర్భంగా మంత్రి కొండా సురేఖ పార్టీ అంతర్గత వ్యవహారాలపై ఘాటు వ్యాఖ్యలు చేశారు. “బీసీ వర్గానికి చెందిన నా విషయంలో ఒక న్యాయం, ఇతర సామాజిక వర్గాలకు మరో న్యాయమా?” అంటూ నేరుగా ప్రశ్నించారు. రాష్ట్ర కేబినెట్లోని ఇతర సామాజిక వర్గాల నేతలపై కూడా తీవ్రమైన ఆరోపణలు ఉన్నాయని, మరి వాటన్నింటికీ పార్టీ ఏం సమాధానం చెబుతుందని, వారిపై ఎలాంటి చర్యలు తీసుకుంటారని నిలదీశారు. తన విషయంలో ఏకపక్షంగా నిర్ణయాలు ఉండకూడదన్న సంకేతాన్ని ఆమె స్పష్టంగా పంపారు.
గీసుకొండ సభ నుంచి పీసీసీ నోటీసుల దాకా : ఇటీవల గీసుకొండ మండలంలో జరిగిన ఓ కార్యక్రమంలో సీఎం రేవంత్ రెడ్డి, పరకాల ఎమ్మెల్యే రేవూరి ప్రకాశ్రెడ్డిలను ఉద్దేశించి కొండా సురేఖ కుమార్తె కొండా సుస్మిత చేసిన వ్యాఖ్యలు కాంగ్రెస్ శ్రేణుల్లో తీవ్ర దుమారానికి దారితీశాయి. ఈ వ్యవహారాన్ని తీవ్రంగా పరిగణించిన టీపీసీసీ క్రమశిక్షణ కమిటీ, వివరణ ఇవ్వాలని కోరుతూ కొండా సురేఖకు నోటీసులు జారీ చేసింది. క్రమశిక్షణ కమిటీ ఛైర్మన్ డా. మల్లు రవికి కొండా సురేఖ తన లిఖితపూర్వక వివరణను సమర్పించారు. అనంతరం, కొండా సురేఖ వ్యవహారంతో పాటు వనపర్తి జిల్లా పరిణామాలపై ప్రణాళికా సంఘం ఉపాధ్యక్షుడు చిన్నారెడ్డికి సంబంధించిన సమగ్ర నివేదికను క్రమశిక్షణ కమిటీ సిద్ధం చేసింది.
పదవి నుంచి తొలగించాలని సిఫార్సు? : పార్టీ గీత దాటిన నేతలపై కఠిన చర్యలు తీసుకోవాలని పీసీసీ క్రమశిక్షణ కమిటీ సిఫార్సు చేసినట్లు విశ్వసనీయ వర్గాల సమాచారం. క్రమశిక్షణ కమిటీ రూపొందించిన పూర్తి స్థాయి నివేదికను ఛైర్మన్ మల్లు రవి పీసీసీ అధ్యక్షుడు మహేశ్ కుమార్ గౌడ్కు అందజేశారు. కొండా సురేఖను మంత్రి పదవి నుంచి తొలగించాలనే సిఫార్సుతో కూడిన నివేదికను ఏఐసీసీ పెద్దలకు పంపినట్లు ప్రచారం జరుగుతోంది.
ఈ నివేదికపై ఇప్పటికే ముఖ్యమంత్రి, పీసీసీ చీఫ్, ఇతర కీలక నేతలతో ఏఐసీసీ చర్చించింది. హస్తిన వేదికగా మంత్రి కొండా సురేఖ చేసిన వ్యాఖ్యలు, మరోవైపు పీసీసీ క్రమశిక్షణ కమిటీ నివేదిక వెరసి తెలంగాణ కాంగ్రెస్లో రాజకీయ వాతావరణాన్ని వేడెక్కించాయి. సామాజిక సమీకరణాలు, పార్టీ క్రమశిక్షణను బేరీజు వేసుకుంటూ అధిష్ఠానం ఎలాంటి నిర్ణయం ప్రకటిస్తుందనేది ప్రస్తుతం ఉత్కంఠభరితంగా మారింది.