Wayanad Landslides: కేరళలోని వయనాడ్ (Wayanad) జిల్లాను కొండచరియల ముప్పు మళ్లీ వెంటాడుతోంది. నిన్న రాత్రి నుంచి ఎడతెరిపి లేకుండా కురుస్తున్న కుంభవృష్టి వానలకు వయనాడ్లో మరోసారి భారీగా కొండచరియలు విరిగిపడి బీభత్సం సృష్టించాయి. అనక్కంపొయిల్-కల్లాడి సొరంగ మార్గ నిర్మాణ స్థలం (Tunnel Project Site) వద్ద ఈ ఘోర ప్రమాదం చోటుచేసుకుంది.
కల్లాడి మీనాక్షి వంతెన సమీపంలో ప్రమాదం: మంగళవారం ఉదయం కల్లాడిలోని మీనాక్షి వంతెనకు సమీపంలో ఒక్కసారిగా కొండ పైభాగం నుండి భారీగా మట్టి, రాళ్లు విరిగిపడ్డాయి. ఆ సమయంలో అక్కడ సొరంగం పనుల్లో నిమగ్నమై ఉన్న కార్మికులు ఆ శిథిలాల కింద చిక్కుకుపోయారు. సమాచారం అందుకున్న వెంటనే విపత్తు నిర్వహణ మరియు సహాయక సిబ్బంది యుద్ధప్రాతిపదికన రంగంలోకి దిగారు. కొండచరియల కింద చిక్కుకున్న కొంతమంది కార్మికులను రెస్క్యూ టీమ్ సురక్షితంగా వెలికితీసింది. శిథిలాల కింద మరికొంతమంది కార్మికులు చిక్కుకుని ఉంటారని అధికారులు భావిస్తున్నారు. ప్రస్తుతం ఘటనాస్థలంలో భారీ యంత్రాలతో సహాయక చర్యలు ముమ్మరంగా కొనసాగుతున్నాయి. వర్షం ఎడతెరిపి లేకుండా కురుస్తుండటంతో రెస్క్యూ ఆపరేషన్కు తీవ్ర అంతరాయం ఏర్పడుతోంది. వయనాడ్ పరిసర ప్రాంతాల ప్రజలు అప్రమత్తంగా ఉండాలని స్థానిక యంత్రాంగం హెచ్చరించింది.
Also read-Mumbai: మూడు రోజులుగా ముంబయిలో భారీ వర్షం.. ఎక్స్ప్రెస్వేపై విరిగిపడ్డ కొండచరియలు!