కొల్లాపూర్ ( తెలుగు ప్రభ ) : తెలంగాణ కాంగ్రెస్ రాజకీయాల్లో మంత్రివర్గ పునర్వ్యవస్థీకరణ, కొండా సురేఖ బర్తరఫ్ వ్యవహారం అగ్గిరాజేస్తున్న వేళ.. పంచాయతీరాజ్, గ్రామీణాభివృద్ధి శాఖ మంత్రి సీతక్క చేసిన వ్యాఖ్యలు రాజకీయ వర్గాల్లో తీవ్ర చర్చనీయాంశంగా మారాయి. మహబూబ్‌నగర్ జిల్లా కొల్లాపూర్ పర్యటనలో ఉన్న ఆమెను మీడియా పలకరించగా, కొండా సురేఖ ఉద్వాసన ఎపిసోడ్‌పై కుండబద్దలు కొట్టారు. “వ్యక్తుల కంటే పార్టీయే మిన్న.. క్రమశిక్షణా రాహిత్యాన్ని సహించే ప్రసక్తే లేదు” అంటూ అధిష్ఠానం తీసుకున్న నిర్ణయాన్ని ఆమె ముక్తకంఠంతో సమర్థించారు.
క్రమశిక్షణ అందరికీ సమానమే.. వ్యక్తుల కోసం నియమాలు మారవు : పార్టీలో ఏ స్థాయి నాయకులైనా క్రమశిక్షణ అనే పరిధిలోనే పనిచేయాలని మంత్రి సీతక్క స్పష్టం చేశారు. కాంగ్రెస్ పార్టీ ఏ ఒక్కరి మెప్పుకోసమో, వ్యక్తుల బెదిరింపులకో తలొగ్గే బలహీనమైన స్థితిలో లేదని తేల్చిచెప్పారు. “రేపు నేనే స్వయంగా పార్టీ గీత దాటినా, మరెవరైనా హద్దులు మీరినా అధిష్ఠానం తీసుకునే క్రమశిక్షణా చర్యలకు కట్టుబడి ఉండాల్సిందే. వ్యక్తుల కోసం పార్టీ నిబంధనలు మారవు” అని సీతక్క కుండబద్దలు కొట్టారు.
అధినేతపై బాహాట విమర్శలు.. సహించని అధిష్ఠానం : ప్రభుత్వానికి సారథ్యం వహిస్తున్న ముఖ్యమంత్రి ఎ. రేవంత్ రెడ్డిపై నేరుగా బహిరంగ వ్యాఖ్యలు, విమర్శలు చేయడాన్ని ఏఐసీసీ నాయకత్వం అత్యంత తీవ్రంగా పరిగణించిందని ఆమె వివరించారు. పార్టీలో ఎవరికైనా అసంతృప్తి, మనస్పర్థలు లేదా బాధలు ఉంటే నాలుగు గోడల మధ్య అంతర్గత వేదికలపై చర్చించుకోవాలే తప్ప, మీడియా ముందుకు వచ్చి ప్రభుత్వాన్ని, పార్టీ గౌరవాన్ని రచ్చకెక్కించడం ఏమాత్రం ఆమోదయోగ్యం కాదన్నారు. అంతర్గత చర్చలే సంస్థాగత పునాదులను పటిష్టం చేస్తాయని హితవు పలికారు.
బీఆర్‌ఎస్‌కు దిమ్మతిరిగే కౌంటర్: కాంగ్రెస్‌లో అంతర్గత పరిణామాలపై విమర్శలు గుప్పిస్తున్న ప్రతిపక్ష బీఆర్‌ఎస్‌పై సీతక్క తీవ్రస్థాయిలో విరుచుకుపడ్డారు. గత పదేళ్ల తమ పాలనలో ఏం జరిగిందో కేటీఆర్ ఒక్కసారి ఆత్మపరిశీలన చేసుకోవాలని ఎద్దేవా చేశారు. సొంత చెల్లెలు కల్వకుంట్ల కవితను పార్టీ వ్యవహారాల నుంచి ఎందుకు పక్కన పెట్టారో కేటీఆర్ ప్రజలకు సమాధానం చెప్పాలని నిలదీశారు. గత బీఆర్‌ఎస్ ప్రభుత్వంలో అప్పటి ఉప ముఖ్యమంత్రి డాక్టర్ తాటికొండ రాజయ్యను ఏ కారణంతో, ఏ నిబంధనల ప్రకారం అర్ధాంతరంగా మంత్రివర్గం నుంచి బర్తరఫ్ చేశారో ఇప్పటికీ ఎవరికీ తెలియదని గుర్తుచేశారు. తమ చరిత్రను మరుగున పెట్టి నేడు కాంగ్రెస్ క్రమశిక్షణా చర్యలపై బురదజల్లే నైతిక హక్కు విపక్షాలకు లేదని మండిపడ్డారు.
పార్టీలోనే సురేఖ.. ఐక్యతే అసలైన బలం : కొండా సురేఖ ఇప్పటికీ కాంగ్రెస్ పార్టీలోనే కొనసాగుతున్నారని, శ్రేణులంతా సంయమనం పాటించాలని ఆమె కోరారు. ప్రజలు కాంగ్రెస్ ప్రజాపాలనపై అపారమైన విశ్వాసాన్ని ఉంచారని, ఆ ఆకాంక్షలకు అనుగుణంగా పరిపాలన సాగించాలంటే పార్టీ నాయకత్వమంతా సమష్టిగా, ఐక్యంగా ముందుకు సాగాలని సీతక్క పిలుపునిచ్చారు. అధిష్ఠానం తీసుకున్న నిర్ణయాన్ని శిరసావహించి ముందుకు నడవడమే ప్రతి ఒక్కరి బాధ్యతని స్పష్టం చేశారు.