Tamil Nadu: తమిళనాడులో ప్రభుత్వ ఏర్పాటుపై ఉత్కంఠ కొనసాగుతూనే ఉంది. రాష్ట్రంలో మారుతున్న రాజకీయ సమీకరణాల నేపథ్యంలో తమ ఎమ్మెల్యేలు చేజారిపోకుండా కాంగ్రెస్ అధిష్టానం అప్రమత్తమైంది. తమిళనాడు కాంగ్రెస్ కమిటీ (TNCC)కి చెందిన ఎమ్మెల్యేలందరినీ ప్రత్యేక విమానంలో చెన్నై నుండి హైదరాబాద్కు తరలించారు.
టీవీకే ప్రభుత్వానికి మద్దతు: తమిళనాడులో విజయ్ నేతృత్వంలోని టీవీకే (TVK) పార్టీకి కాంగ్రెస్ ఇప్పటికే అధికారికంగా మద్దతు ప్రకటించింది. అయితే ప్రస్తుతం ఏ పార్టీకీ స్పష్టమైన మెజారిటీ లేకపోవడం, ఐయూఎంఎల్ (IUML) వంటి కీలక పార్టీలు మద్దతు ఉపసంహరించుకోవడంతో సీఎం పీఠం ఎవరనేదానిపై మరింత ఉత్కంఠ నెలకొంది. విజయ్ ప్రభుత్వం కొలువుదీరాలంటే ప్రతి ఎమ్మెల్యే మద్దతు ఇప్పుడు అత్యంత కీలకం. ఈ క్రమంలో ప్రత్యర్థి పార్టీలు తమ ఎమ్మెల్యేలకు గాలం వేసే అవకాశం ఉందన్న ఆందోళనతో కాంగ్రెస్ ఈ క్యాంప్ రాజకీయం మొదలుపెట్టింది.
తెలంగాణే సేఫ్ జోన్: తెలంగాణలో ప్రస్తుతం కాంగ్రెస్ ప్రభుత్వమే అధికారంలో ఉండటంతో, ఇక్కడ తమ ఎమ్మెల్యేలకు పూర్తి రక్షణ ఉంటుందని అధిష్టానం భావిస్తోంది. లోక్భవన్లో ప్రభుత్వ ఏర్పాటు ప్రక్రియ పూర్తయి.. అసెంబ్లీలో బలపరీక్ష ముగిసే వరకు వీరంతా హైదరాబాద్లోనే ఉండనున్నారు.