TDP Mahanadu: టీడీపీ శ్రేణులు ఎప్పుడెప్పుడా అని ఎదురుచూస్తున్న మహానాడుకు ముహూర్తం ఖరారైంది. ఈ ఏడాది మహానాడును నెల్లూరు వేదికగా నిర్వహించాలని పార్టీ అధిష్టానం నిర్ణయించింది. పార్టీ వర్కింగ్‌ ప్రెసిడెంట్‌గా నారా లోకేశ్‌ బాధ్యతలు చేపట్టిన అనంతరం జరుగుతున్న తొలి మహానాడు కావడంతో .. టీడీపీ నేతల్లో జోష్‌ నెలకొంది.

పార్టీ కేడర్‌లో నూతనోత్తేజం: నెల్లూరులోని ఇఫ్కో కిసాన్ సెజ్ (IFFCO Kisan SEZ) భూములను మహానాడు వేదికగా ఎంపిక చేశారు. ఈ నెల 27, 28, 29 తేదీల్లో మూడు రోజుల పాటు ఈ వేడుకలు అత్యంత వైభవంగా జరగనున్నాయి. దీంతో నెల్లూరు జిల్లా టీడీపీ నాయకులు, కార్యకర్తలు ఏర్పాట్లలో నిమగ్నమయ్యారు. భారీ ఎత్తున జనసమీకరణ చేసేలా ప్రణాళికలు రచిస్తున్నారు. వాస్తవానికి ఈ సభలు గతంలోనే జరగాల్సి ఉన్నప్పటికీ.. వివిధ రాజకీయ సమీకరణాల వల్ల పలుమార్లు వాయిదా పడుతూ వచ్చాయి. ఎట్టకేలకు వేదికపై స్పష్టత రావడంతో పార్టీ శ్రేణుల్లో కొత్త ఉత్సాహం నెలకొంది. ఈ సభ ద్వారా పార్టీ కేడర్‌లో నూతనోత్తేజాన్ని నింపాలని అధినాయకత్వం భావిస్తోంది.

Also read-West Bengal Elections: బెంగాల్‌, అస్సాంలో ఎన్డీఏ విజయం.. చంద్రబాబు, లోకేశ్‌ స్పందన ఇదే.!

భవిష్యత్తు కార్యాచరణపై దిశానిర్దేశం: తెలుగు రాష్ట్రాల నుండి కీలక నాయకులు, వేలాది మంది కార్యకర్తలు ఈ మూడు రోజుల సభకు హాజరు కానున్నారు. రాబోయే రాజకీయ పరిణామాలు, ఎన్నికల వ్యూహాలు మరియు పార్టీ భవిష్యత్తు కార్యాచరణపై టీడీపీ అధినేత నారా చంద్రబాబు నాయుడు ఈ వేదిక నుంచి దిశానిర్దేశం చేయనున్నారు. రాష్ట్ర రాజకీయాల్లో ఈ సభ అత్యంత కీలకం కానుందని రాజకీయ విశ్లేషకులు భావిస్తున్నారు.