Rajya Sabha: తెలంగాణ నుంచి రెండు రాజ్యసభ స్థానాలకు అభ్యర్థుల ఎంపికపై కాంగ్రెస్ పార్టీ కసరత్తు తుది దశకు చేరుకుంది. అసెంబ్లీలో ఉన్న ఎమ్మెల్యేల సంఖ్యాబలాన్ని బట్టి కాంగ్రెస్కు రెండు సీట్లు దక్కే అవకాశం ఉంది. దీంతో అధిష్టానం ఎవరిని ఎంపిక చేస్తుందనే దానిపై సర్వత్రా ఆసక్తి నెలకొంది.
అభిషేక్ సింఘ్వీకి లైన్ క్లియర్?: ఏఐసీసీ కోటాలో భాగంగా ప్రముఖ న్యాయవాది, సీనియర్ నేత అభిషేక్ మను సింఘ్వీ పేరు దాదాపు ఖరారైనట్లు సమాచారం. ఈ నేపథ్యంలోనే ఆయన నేడు తెలంగాణకు రానున్నారు. ఆయన అభ్యర్థిత్వంపై అధిష్టానం మొగ్గు చూపుతున్నట్లు గాంధీ భవన్ వర్గాల ద్వారా తెలుస్తోంది.
Also read-Jagga Reddy: సీనియర్లకు అవకాశం ఇవ్వాలి.. ఖర్గేకు జగ్గారెడ్డి విజ్ఞప్తి!
రెండో స్థానం కోసం భారీ పోటీ: రాష్ట్ర కోటా కింద దక్కే రెండో సీటు కోసం తెలంగాణ కాంగ్రెస్ సీనియర్ నేతలు పెద్ద ఎత్తున ప్రయత్నాలు చేస్తున్నారు. సామాజిక సమీకరణాలు, పార్టీకి చేసిన సేవలను పరిగణనలోకి తీసుకుని ఈ పదవిని ఎవరికి కట్టబెడతారనేది ఇప్పుడు ఉత్కంఠగా మారింది. అయితే మరికొద్ది సేపట్లో అభ్యర్థుల పేర్లను అధికారికంగా ప్రకటించే అవకాశం ఉంది. నేడు ఉదయం 11 గంటలకే కాంగ్రెస్ అభ్యర్థులు నామినేషన్లు దాఖలు చేస్తారని సమాచారం. దీంతో గాంధీ భవన్లో సందడి నెలకొంది. రాష్ట్ర రాజకీయాల్లో పట్టు పెంచుకోవాలని చూస్తున్న తరుణంలో ఈ రాజ్యసభ స్థానాల భర్తీ ద్వారా కాంగ్రెస్ పార్టీ సామాజిక సమతుల్యతను ఎలా పాటిస్తుందో వేచి చూడాలి.
ఎన్నికలషెడ్యూల్ తేదీలు:
- నోటిఫికేషన్ విడుదల: ఫిబ్రవరి 26
- నామినేషన్ల స్వీకరణకు చివరి తేదీ: మార్చి 5
- నామినేషన్ల పరిశీలన (స్క్రూటినీ): మార్చి 6
- నామినేషన్ల ఉపసంహరణకు గడువు: మార్చి 9
- పోలింగ్ తేదీ: మార్చి 16 (ఉదయం 9 నుండి సాయంత్రం 4 గంటల వరకు)
- ఓట్ల లెక్కింపు: మార్చి 16 (సాయంత్రం 5 గంటల నుండి)
- ఎన్నికల ప్రక్రియ ముగింపు: మార్చి 20