Weight loss bonus: చైనా కంపెనీలు వినూత్న ప్రోత్సహకాలు ఇవ్వడంలో ఎప్పుడూ ముందుంటాయి. అయితే, మెరుగైన పనితీరు కనబరిస్తేనో, కంపెనీ మంచి లాభాలు సాధిస్తేనే బోనస్ ఇవ్వడం సహజం. కానీ, చైనాకు చెందిన ఓ కంపెనీ కాస్త వినూత్న ఆలోచన చేసింది. తమ కంపెనీలో పనిచేసే ఉద్యోగుల్లో ఆరోగ్యకర జీవనశైలిని అలవాటు చేయడం కోసం కొత్త ఆలోచనతో ముందుకొచ్చింది. బరువు తగ్గిస్తే బోనస్ ఇస్తామని ప్రకటించింది. మరి ఉద్యోగులు ఈ అవకాశాన్ని వినియోగించుకున్నారా? అంటే ఔనని చెప్పొచ్చు. చైనాలోని ఇన్‌స్టా 360గా పేరొందిన అరాషి విజన్ సంస్థ వెయిట్‌లాస్‌ ఛాలెంజ్‌ ఇటీవల ప్రారంభించింది. ఇందుకోసం సుమారు రూ.1.1 కోట్ల నిధులను అలాట్ చేసింది. అయితే, ఈ ఛాలెంజ్‌లో ఒక వ్యక్తి తగ్గే ప్రతి అరకిలోకు దాదాపు రూ.5,800 బహుమతిగా ఇస్తారు. అలా ఈ ఏడాది జెన్‌జీ ఉద్యోగి షీయాకీ 90 రోజుల్లోనే 20 కిలోలు తగ్గి దాదాపు రూ.2.5 లక్షలు సంపాదించింది. దీంతో ఆమెకు ‘వెయిట్‌లాస్‌ ఛాంపియన్‌’ టైటిల్‌ దక్కింది. బరువు తగ్గేందుకు ఆహారాన్ని నియంత్రించానని, రోజూ గంటన్నర వ్యాయామం చేశానని ఆమె వెల్లడించారు.
Read Also: BCCI: అరటిపండ్లకు రూ.35 లక్షలా? బీసీసీఐకి హైకోర్టు నోటీసులు..!
వర్క్ లైఫ్ తో..
ఈ ఛాలెంజ్‌ ద్వారా ఉద్యోగులు ఆరోగ్యానికి ప్రాధాన్యం ఇచ్చేలా చేయడం, వర్క్‌లైఫ్‌తో పాటు వ్యక్తిగత జీవితంలోనూ ఉత్సాహంగా ముందుకు సాగేలా ప్రోత్సహించడమే తమ లక్ష్యమని ఆరాషి విజన్ సంస్థ ప్రతినిధి తెలిపారు. అయితే ఇందులో ఓ స్పెషల్ రూల్ కూడా ఉంది. అయితే, ఎవరైనా మళ్లీ బరువు పెరిగితే ప్రతి 0.5 కిలోలకు దాదాపు రూ.9,300 జరిమానా కట్టాలి. ఇప్పటివరకు ఎవరికీ జరిమానా పడలేదని కంపెనీ తెలిపింది. అయితే, ఈ కార్యక్రమంపై నెటిజన్లు రకరకాలుగా స్పందిస్తున్నారు. ఉద్యోగుల ఆరోగ్యాన్ని పెంపొందించేందుకు మంచి ఆలోచన అని కొందరు ప్రశంసిస్తుండగా.. బరువు పెరిగితే జరిమానా విధించడం నైతికంగా సరికాదని మరికొందరు విమర్శిస్తున్నారు.
Read Also: Supreme Court: నేపాల్‌లో పరిస్థితి గమనించండి.. సుప్రీంకోర్టు కీలక వ్యాఖ్యలు
