Parasite In Eye: మధ్యప్రదేశ్‌లోని ఒక గ్రామీణ ప్రాంతానికి చెందిన 35 ఏళ్ల వ్యక్తికి కలిగిన అనుభవం ఇప్పుడు అంతర్జాతీయ వైద్యరంగంలో తీవ్రమైన చర్చకు దారితీసింది. కంటి చూపు మసకబారినట్లు అనిపించడంతో అతడు సమీప ఆసుపత్రికి వెళ్లాడు. అక్కడి నిపుణులు అతని కంటి వెనుక భాగాన్ని పరిశీలించేందుకు ఫండోస్కోపీ పరీక్ష చేపట్టారు. అయితే ఆ పరీక్షలో వారిని ఆశ్చర్యానికి గురిచేసిన ఒక దృశ్యం బయటపడింది. కంటి లోపల ఒక పురుగు కదులుతూ కనిపించడం వైద్యులను షాక్‌కు గురిచేసింది.
గ్నాథోస్టోమా స్పినిగెరమ్..
తరువాత నిర్వహించిన పరీక్షలలో ఆ పురుగు “గ్నాథోస్టోమా స్పినిగెరమ్” అనే అరుదైన పరాన్నజీవి అని తేలింది. సాధారణంగా ఈ జీవులు పిల్లులు, కుక్కలు వంటి జంతువుల శరీరాల్లో ఉంటాయి. కానీ సరిగ్గా ఉడకని చేపలు, కోడి మాంసం, అలాగే పాములు లేదా కప్పల మాంసం తినడం వల్ల ఇవి మనిషి శరీరంలోకి ప్రవేశించే అవకాశం ఉంటుందని నిపుణులు వివరించారు. ఆ రోగి కూడా గతంలో సరిగా ఉడకని మాంసం తిన్నట్టు గుర్తించారు. దీంతో అతని శరీరంలోకి ఆ పరాన్నజీవి చేరి చివరికి కంటికి దారి తీసినట్టు వైద్యులు గుర్తించారు.
పరాన్నజీవులు ముందుగా..
డాక్టర్ల సమాచారం ప్రకారం ఈ రకమైన పరాన్నజీవులు ముందుగా రక్తప్రసరణలోకి చేరతాయి. అక్కడి నుంచి మెల్లగా కంటి భాగానికి కదిలి చేరతాయి. కంటిలో వీటి ఉనికి రోగికి తీవ్రమైన ఇబ్బందులు కలిగిస్తుంది. కొన్ని సందర్భాల్లో చూపు శాశ్వతంగా కోల్పోయే ప్రమాదం కూడా ఉందని వారు తెలిపారు.
సదరు వ్యక్తి కంటిలో కదులుతున్న పురుగును తొలగించడానికి వైద్యులు ‘పార్స్ ప్లానా విట్రెక్టమీ’ అనే ప్రత్యేక శస్త్రచికిత్స నిర్వహించారు. ఈ శస్త్రచికిత్సలో కంటి వెనుక భాగాన్ని నిశితంగా పరిశీలించి ఆ పురుగును బయటకు తీశారు. అనంతరం మైక్రోస్కోప్ సహాయంతో పరీక్షించినప్పుడు అది గ్నాథోస్టోమా పరాన్నజీవి అని కచ్చితంగా నిర్ధారణ అయింది.
Also Read: https://teluguprabha.net/national-news/mumbai-monorail-stalls-mid-track-passengers-rescued/
ఈ కేసు వివరాలను వైద్యులు ప్రపంచ ప్రఖ్యాత వైద్య పత్రిక “న్యూ ఇంగ్లాండ్ జర్నల్ ఆఫ్ మెడిసిన్”లో పొందుపరిచారు. ఇది అరుదుగా జరగే సమస్య అయినప్పటికీ, రోగులకు వచ్చే ప్రభావం తీవ్రమై ఉండే అవకాశం ఉందని ఆ నివేదికలో పేర్కొన్నారు.
