కొల్లాపూర్ పట్టణ కేంద్రంలోని జిల్లా పరిషత్ ఉన్నత పాఠశాలలో నాగర్ కర్నూల్ జిల్లా కలెక్టర్ బాధావత్ సంతోష్ విద్యార్థులతో కలిసి సహపంక్తి భోజనం చేశారు. మెనూ ప్రకారం నాణ్యత, ప్రమాణాలను పాటిస్తూ విద్యార్థులకు పౌష్టిక ఆహరం అందించాలని ఆదేశించారు.
కొల్లాపూర్ పట్టణంలోని జిల్లా పరిషత్ బాలికల ఉన్నత పాఠశాలను సందర్శించి విద్యార్థులతో కలిసి సహపంక్తి మధ్యాహ్న భోజనం చేశారు. కలెక్టర్ విద్యార్థులతో మమేకమై వారి పరిస్థితులను తెలుసుకోవడానికి ప్రాధాన్యత ఇవ్వడం, వారి సమస్యలు తెలుసుకోవడం ద్వారా, ఆచరణాత్మక పరిష్కారాలను సూచించారు.
వంటవాళ్లకు ప్రశంసలు
భోజనం తయారుచేసే సిబ్బందిని వ్యక్తిగతంగా ప్రశంసించడం ద్వారా వారు చేసే సేవకు గౌరవం చూపించారు. విద్యార్థుల కోసం ప్రతిరోజూ రుచికరమైన, పోషణతో కూడిన భోజనం అందించాల్సిందిగా వంట సిబ్బందిని ప్రోత్సహించారు. పదో తరగతిలో అత్యుత్తమ మార్కులు సాధించే విద్యార్థులకు మొబైల్ ఫోన్ బహుమతిగా అందజేస్తానని హామీ ఇచ్చి, విద్యార్థులలో మెరుగైన ఫలితాలు సాధించడానికి ప్రేరణను కలిగించారు. విద్యార్థులకు మంచి ప్రోత్సాహాన్ని, వారు కృషి చేయడానికి, ఉత్తమ ఫలితాలు సాధించడానికి ఉపయోగపడుతుందన్నారు.
కలెక్టర్ విద్యార్థులకు కష్టపడి చదువుకోవడం ద్వారా తమ కుటుంబానికి, పాఠశాలకు, కొల్లాపూర్ ప్రాంతానికి మంచి పేరు తెచ్చేలా కృషి చేయాలని సూచించారు. ఇలా విద్యార్థులను ప్రోత్సహించడమే కాకుండా, వారి భవిష్యత్ ప్రగతికి మార్గదర్శనం చేయడం వంటి పనులు ఉపాధ్యాయులు చేయవలసిన ముఖ్యమైన బాధ్యతలలో భాగమని తెలిపారు. అధికారుల సందర్శన ద్వారా సానుకూలమైన మార్పులు తీసుకురావచ్చని సూచించారు. కలెక్టర్ పాఠశాల సందర్శన సందర్భంగా ప్రధానోపాధ్యాయులను పిలిపించి పాఠశాలలో ప్రస్తుతం ఉన్న వసతులు, విద్యార్థులకు అందుబాటులో ఉన్న వనరులు, గత సంవత్సరం పదో తరగతి విద్యార్థుల ఉత్తీర్ణత శాతం తదితర వివరాలను అడిగి తెలుసుకున్నారు. విద్యార్థుల విజయం కోసం మరింత మెరుగైన వసతుల కల్పన, పాఠశాల అభివృద్ధికి అవసరమైన చర్యలను పరిశీలించారు.
కలెక్టర్ వెంట ఆర్డిఓ బన్సీలాల్ తహసిల్దార్ విష్ణువర్ధన్ రావు, పాఠశాల సిబ్బంది ఉన్నారు.
