IRAN ISRAEL TENSIONS: ఇజ్రాయెల్ దాడుల్లో కీలక నేతల మృతి

Israel Strikes Kill Key Iranian Military Leaders : యుద్ధం ఎప్పుడూ ప్రాణాలను బలిగొంటుంది. గెలుపోటములు ఎవరివైనా, చివరికి నష్టపోయేది మాత్రం అమాయక ప్రజలే. ప్రస్తుతం పశ్చిమాసియాలో నెలకొన్న పరిస్థితులు ఈ చేదు నిజాన్ని మరోసారి రుజువు చేస్తున్నాయి. అమెరికా హెచ్చరికలను బేఖాతరు చేస్తూ, ఇరాన్‌పై ఇజ్రాయెల్ జరిపిన వైమానిక దాడులు తీవ్ర ఉద్రిక్తతలకు దారి తీశాయి. ఈ దాడుల్లో ఇరాన్‌ అణు కర్మాగారాలు, సైనిక స్థావరాలు లక్ష్యంగా మారాయి. అత్యంత దారుణంగా, ఈ భీకర దాడుల్లో ఇరాన్‌ రెవల్యూషనరీ గార్డ్​ చీఫ్‌, మిలిటరీ చీఫ్‌ వంటి కీలక నాయకులతో పాటు పలువురు టాప్‌ అణు శాస్త్రవేత్తలు, సైన్యంలోని సీనియర్‌ జనరల్స్‌ కూడా ప్రాణాలు కోల్పోయారు.

కీలక సైనిక నాయకులు మృతి
ఇరాన్‌పై ఇజ్రాయెల్ వైమానిక దాడుల్లో ఇరాన్‌ రెవల్యూషనరీ గార్డ్ (ఐఆర్‌జీసీ) చీఫ్‌ మేజర్‌ జనరల్‌ హొస్సేన్‌ సలామీ, ఇరాన్ మిలిటరీ చీఫ్ మహమ్మద్‌ బాఘేరి​ మరణించినట్లు ఇరాన్ మీడియా వెల్లడించింది. ఈ దాడుల్లో ఇతర ఉన్నత రెవల్యూషనరీ గార్డ్ అధికారులు, అణు శాస్త్రవేత్తలు, సైన్యంలోని సీనియర్‌ జనరల్స్‌ కూడా ప్రాణాలు కోల్పోయినట్లు సమాచారం.

ఇరాన్ ఆర్మీ చీఫ్ మహమ్మద్ బాఘేరి: యుద్ధ అనుభవం, ఆంక్షలు
టెహ్రాన్‌లో జన్మించిన మహమ్మద్ బాఘేరి, ఇరాన్‌ రివల్యూషనరీ గార్డ్స్‌ కోర్‌ (IRGC)లో సుదీర్ఘ కాలం సేవలందించారు. 2016లో ఇరాన్‌ ఆర్మీ చీఫ్‌ ఆఫ్‌ స్టాఫ్‌గా కీలక బాధ్యతలు స్వీకరించారు. ఆయన 1980లో IRGCలో చేరి, ఇరాన్‌-ఇరాక్ యుద్ధంలో చురుకుగా పోరాడారు. అయితే, బాఘేరిపై మానవ హక్కుల ఉల్లంఘన ఆరోపణలు ఉన్నాయి. ఈ కారణంగా అమెరికా, కెనడా, యూకే, ఐరోపా సమాఖ్య వంటి దేశాలు ఆయనపై ఆంక్షలు విధించాయి.

మాకు వేరే మార్గం లేదు :
ఇరాన్‌పై ఇజ్రాయెల్ గురువారం అర్ధరాత్రి, శుక్రవారం ఉదయం రెండు దశల వైమానిక దాడులు చేసింది. టెల్ అవీవ్ (ఇజ్రాయెల్) ఇరాన్‌లోని అణు కర్మాగారాలు, సైనిక స్థావరాలను లక్ష్యంగా చేసుకోగా, నతాంజ్ యురేనియం శుద్ధి కేంద్రంపై పలుమార్లు జెట్ దాడులు జరిగినట్లు ఇరాన్ మీడియా పేర్కొంది. ఈ దాడుల వల్ల ఆ ప్రాంతంలో భారీ పొగలు వ్యాపించాయి. ఈ నతాంజ్‌ అణుకేంద్రం వద్ద మరోసారి పేలుళ్లు సంభవించినట్లు సమాచారం. ఇరాన్ గుండెపై దాడి చేశామని నెతన్యాహు ప్రకటించగా, తమకు వేరే మార్గం లేదని ఇజ్రాయెల్ ఆర్మీ చీఫ్ పేర్కొన్నారు.