చత్తీస్ గఢ్ లోని బీజాపూర్ జిల్లాలో జరిగిన భారీ ఎన్ కౌంటర్ జరిగింది. బీజాపూర్ జిల్లా మిర్తూర్ పోలీస్ స్టేషన్ పరిధిలోని పోమ్రా-హల్లూర్ అటవీ ప్రాంతంలో బీజాపూర్ డివిజన్ కమిటీ సభ్యులు సహా దాదాపు 40 మంది మావోయిస్టులు సమావేశమైనట్లు పోలీసులకు సమాచారం అందింది. వెంటనే సెంట్రల్ రిజర్వ్ ఫోర్స్, జిల్లా రిజర్వు బలగాలు, స్పెషల్ టాస్క్ ఫోర్స్ ఆ ప్రాంతానికి చేరుకుని మావోయిస్టుల సమావేశ ప్రాంతం కోసం గాలించాయి.
ఈ క్రమంలో ఓ మావోయిస్టుల వర్గం పోలీసుల కంట పడటంతో.. ఇరు వర్గాల మధ్య ఎదురు కాల్పులు జరిగాయి. ఈ ఘటనలో ఇద్దరు మహిళలు సహా.. ఆరుగురు మావోయిస్టులు మృతి చెందారు. మరో ముగ్గురు గాయపడ్డారు. మృతుల్లో నలుగురిని బలగాలు స్వాధీనం చేసుకోగా.. మరో రెండింటిని బీజాపూర్ మావోయిస్టులు ఎత్తుకెళ్లినట్లు బీజాపూర్ పోలీసులు తెలిపారు. ఘటనా స్థలం నుండి 303, 315 రైఫిళ్లతో పాటు మూడు ఆయుధాలు, మందుపాతర సామాగ్రి స్వాధీనం చేసుకున్నారు. డిసెంబరు 2 నుండి 8 వరకు పీపుల్స్ గెరిల్లా ఆర్మీ వారోత్సవాల నిర్వహణ ఏర్పాట్లలో భాగంగానే మావోయిస్టులు అక్కడ సమావేశమైనట్లు పోలీసులు భావిస్తున్నారు.
