ఎల్బి.నగర్ నియోజకవర్గ పరిధిలోని చైతన్యపురి డివిజన్లో కొత్తగా నిర్మిస్తున్న టిమ్స్ హాస్పిటల్స్ పనులను ఎల్బి.నగర్ శాసనసభ్యులు దేవిరెడ్డి సుధీర్ రెడ్డి పరిశీలించారు. ఈ సందర్భంగా సుధీర్ రెడ్డి మాట్లాడుతూ.. ఈ హాస్పిటల్ దాదాపు 26 అంతస్థులతో నిర్మాణం జరుగుతుందని తెలిపారు. భవిష్యత్తులో ఈ ప్రాంతంలో స్థలాలు దొరకడం కష్టంగా భావించి మాజీ ముఖ్యమంత్రి వర్యులు కేసీఆర్ ని ఒప్పించి పోలీస్ స్టేషన్, చిల్డ్రన్స్ పార్క్, సబ్ స్టేషన్, వాటర్ ట్యాంక్, ఒక అద్భుతమైన కమ్యూనిటి హాల్ కూడా నిర్మింస్తున్నట్టు వివరించారు. గుడి, మసీదు కూడా నిర్మిస్తామన్నారు.
హాస్పిటల్స్ వచ్చేవారు సేదతీరడానికి ప్రక్కనే అయిదు అంతస్థుల భవనం కూడా నిర్మిస్తున్నామన్నారు. ప్రస్తుతం 2 స్లాబుల నిర్మాణం పూర్తికాగా ప్రతి 25 నుంచి 30 రోజులకు ఒకసారి ఒక్కో స్లాబ్ నిర్మాణం జరుగుతుందని అన్నారు. నాణ్యత ప్రమాణాలు, తగిన భద్రత చర్యలు పాటిస్తూ పనులు పూర్తి చేయాలని ఆయన అధికారులను కోరారు.
ఈ కార్యక్రమంలో మాజీ కార్పొరేటర్ జిన్నారం విఠల్ రెడ్డి, చంద్రశేఖర్ రెడ్డి, రామకృష్ణ, అధికారులు సుభాష్, రాజు, ఆశాజ్యోతి, పద్మాకర్, భాస్కర్ రెడ్డి, సంతోష్ కుమార్, గణేష్ తదితరులు పాల్గొన్నారు.