ఏపీ సీఎం చంద్రబాబు నాయుడి (AP CM Chandrababu Naidu) సోదరుడు నారా రామ్మూర్తి నాయుడు శనివారం కన్నుమూశారు. ఆయన హైదరాబాద్ లోని ఏఐజీ ఆస్పత్రిలో చికిత్స పొందుతూ మృతి చెందారు. తమ్ముడి మరణ వార్త తెలిసిన నారా చంద్రబాబు నాయుడు ఢిల్లీ పర్యటనను రద్దు చేసుకుని హుటాహుటిన హైదరాబాద్ కు చేరుకున్నారు.
శంషాబాద్ విమానాశ్రయం నుంచి చంద్రబాబు నాయుడు నేరుగా గచ్చిబౌలి లోని ఏఐజీ ఆస్పత్రికి చేరుకున్నారు. తమ్ముడి భౌతిక కాయానికి నివాళి అర్పించారు. తమ్ముడి కుమారులు నారా గిరీష్, నారా రోహిత్ లను అక్కున చేర్చుకుని ఓదార్చారు. నందమూరి బాలకృష్ణ కూడా ఆస్పత్రి వద్దకు వచ్చారు. పురందేశ్వరితో పాటు నారా, నందమూరి కుటుంబ సభ్యలు ఆస్పత్రి వద్ద ఉన్నారు. మరోవైపు తన చిన్నాన్న ఆరోగ్యం విషమించిందన్న వార్త తెలియగానే.. శనివారం ఉదయం నారా లోకేశ్ హుటాహుటిన ప్రత్యేక విమానంలో గన్నవరం ఎయిర్ పోర్ట్ నుంచి హైదరాబాద్ కు చేరుకున్నారు. ఇంకోవైపు, చంద్రబాబు స్వగ్రామం నారావారి పల్లెలో రేపు రామ్మూర్తి నాయుడు అంత్యక్రియలు జరుగుతాయని కుటుంబ సభ్యులు ప్రకటించారు.