Aquaculture : ఆంధ్రప్రదేశ్ వ్యవసాయ, మత్స్యశాఖ మంత్రి కింజరాపు అచ్చెన్నాయుడు అధ్యక్షతన సచివాలయంలో జరిగిన ఆక్వాకల్చర్ ఎగ్జిక్యూటివ్ కమిటీ తొలి సమావేశంలో కీలక నిర్ణయాలు తీసుకున్నారు. రాష్ట్రంలోని అన్ని ఆక్వాకల్చర్ యూనిట్లు తప్పనిసరిగా రిజిస్టర్ కావాలని, లైసెన్స్ జారీ ప్రక్రియను సులభతరం చేయాలని అధికారులకు ఆదేశించారు. రిజర్వాయర్లలో కేజ్ కల్చర్ ద్వారా 5 లక్షల టన్నుల చేపల ఉత్పత్తి పెంచే లక్ష్యంతో ప్రణాళికలు రూపొందించారు.
ALSO READ: https://teluguprabha.net/news/andhra-pradesh-aquaculture-committee-meeting-decisions/
మంత్రి అచ్చెన్నాయుడు మాట్లాడుతూ, ఈ నిర్ణయాలు మత్స్య రంగ అభివృద్ధి, సుస్థిర ఆక్వాకల్చర్, రైతుల ఆదాయ పెంపు, దేశీయ మార్కెట్ బలోపేతానికి దోహదపడతాయని పేర్కొన్నారు. రొయ్యల రైతులకు కూటమి ప్రభుత్వం పూర్తి మద్దతు అందిస్తుందని, ధరల స్థిరీకరణకు చర్యలు తీసుకుంటామని హామీ ఇచ్చారు. అమెరికా సుంకాల పెంపు వల్ల రొయ్యల ఎగుమతులపై ప్రభావం పడకుండా, సీఎం చంద్రబాబు నాయుడు కేంద్రంతో సంప్రదింపులు జరుపుతున్నారని తెలిపారు. సుంకం తక్కువ ఉన్న దేశాలకు ఎగుమతులను పెంచడం ద్వారా రైతుల నష్టాలను నివారిస్తామన్నారు.
అక్రమాలను నిరోధించేందుకు, చికెన్ వ్యర్థాలను చేపల చెరువులకు తరలిస్తే కఠిన చర్యలు తీసుకుంటామని, చెరువు యజమానులపై కేసులు నమోదు చేస్తామని మంత్రి హెచ్చరించారు. అక్వా రైతులకు సబ్సిడీ ద్వారా విద్యుత్ ధరలను తగ్గించడం, ఫీడ్ ధరలను నియంత్రించడంపై చర్చలు జరుగుతున్నాయి. ఈ చర్యలు రాష్ట్ర ఆక్వాకల్చర్ రంగాన్ని బలోపేతం చేసి, రైతులకు లాభదాయకమైన భవిష్యత్తును అందిస్తాయని మంత్రి ఆశాభావం వ్యక్తం చేశారు.
