Fire Accident| శ్రీకాకుళం జిల్లాలోని ఓ షాపింగ్ మాల్‌లో భారీ అగ్ని ప్రమాదం సంభవించింది. పలాస పట్టణంలోని జాస్మిన్ బట్టల షాపులో మంటలు ఒక్కసారిగా ఎగిసిపడ్డాయి. దట్టమైన పొగలతో మంటలు వ్యాపించడంతో స్థానికులు భయంతో పరుగులు తీశారు. సమాచారం అందుకున్న అగ్నిమాపక సిబ్బంది ఘటనా స్థలానికి చేరుకుని ఫైరింజన్ల సాయంతో మంటలను అదుపులోకి తీసుకువచ్చేందుకు తీవ్రంగా శ్రమించారు.

షార్ట్ సర్క్యూట్ వల్లే ఈ ప్రమాదం జరిగి ఉండొచ్చని పోలీసులు అనుమానిస్తున్నారు. ఈ అగ్నిప్రమాదం కారణంగా సుమారు రూ.3కోట్ల వరకు ఆస్తి నష్టం వాటిల్లిందని షాపు నిర్వాహకులు అంచనా వేస్తున్నారు. అయితే ఎలాంటి ప్రాణ నష్టం లేకపోవడంతో అందరూ ఊపిరి పీల్చుకున్నారు.