Festive season online shopping tips : “కిలోల లెక్కన చీరలు!”, “ఒకటి కొంటే మరొకటి ఉచితం!”, “ఎన్నడూ లేని విధంగా 80% తగ్గింపు!” – దసరా, దీపావళి పండగల వేళ, ఎక్కడ చూసినా ఈ ఆఫర్ల హోరే. ఈ ఆకర్షణీయ ప్రకటనల మాయలో పడి, అవసరం ఉన్నా లేకపోయినా, చాలామంది ఎగబడి కొనుగోళ్లు చేస్తుంటారు. కానీ, ఈ ఆఫర్ల వెనుక ఉన్న అసలు మర్మం మీకు తెలుసా? ఇది నిజమైన డిస్కౌంటా, లేక వ్యాపారుల మాయాజాలమా? ఈ పండగ షాపింగ్‌లో మీరు మోసపోకుండా ఉండాలంటే, ఎలాంటి జాగ్రత్తలు తీసుకోవాలి?

ఆఫర్ల వెనుక.. అసలు కథ : పండగ సీజన్ వ్యాపారులకు కాసుల వర్షం కురిపిస్తుంది. ఈ సమయంలో, వినియోగదారులను ఆకర్షించేందుకు రకరకాల ఎత్తుగడలు వేస్తారని ఆర్థిక నిపుణులు హెచ్చరిస్తున్నారు.

స్టాక్ క్లియరెన్స్: చాలామంది వ్యాపారులు, తమ వద్ద పేరుకుపోయిన పాత స్టాక్‌ను ఖాళీ చేసుకునేందుకు ఈ ఆఫర్లను ఓ అవకాశంగా వాడుకుంటారు.

ధర పెంచి.. తగ్గింపు: కొన్నిసార్లు, వస్తువు అసలు ధరను విపరీతంగా పెంచి, ఆ తర్వాత దానిపై పెద్ద డిస్కౌంట్ ఇస్తున్నట్లు చూపిస్తారు. అంతిమంగా, మనం చెల్లించేది అసలు ధర కంటే ఎక్కువే కావచ్చు.

అనవసర కొనుగోళ్లు: “ఎక్కువ కొంటే ఎక్కువ తగ్గింపు” అనే ఆశ చూపి, మనకు అవసరం లేని వస్తువులను కూడా కొనేలా చేస్తారు.

“ఆఫర్ల పేరుతో వచ్చే అవకాశాలను క్షుణ్ణంగా పరిశీలించాలి. వ్యాపారులు పాత నిల్వలను అమ్ముకోవడానికి, లేదా ధరను పెంచి డిస్కౌంట్ ఇచ్చి అమ్మడానికి ప్రయత్నిస్తారు. కొనుగోలుదారులు ఈ విషయంలో చాలా జాగ్రత్తగా ఉండాలి.”
– అందె సత్యం, ఆర్థిక నిపుణుడు

ఆన్‌లైన్ మోసాలు.. అప్రమత్తతే ఆయుధం : పండగ సీజన్‌లో ఆన్‌లైన్ మోసాలు కూడా విపరీతంగా పెరుగుతాయి. సైబర్ నేరగాళ్ల వలలో చిక్కకుండా ఉండాలంటే, ఈ జాగ్రత్తలు తప్పనిసరి.

గుడ్డిగా నమ్మొద్దు: సోషల్ మీడియాలో, వాట్సాప్‌లో వచ్చే “ఖరీదైన వస్తువులు అతి తక్కువ ధరకే” వంటి ప్రకటనలను గుడ్డిగా నమ్మవద్దు.

నకిలీ లింకులు: ఫ్లిప్‌కార్ట్, అమెజాన్ వంటి ప్రముఖ ఈ-కామర్స్ వెబ్‌సైట్ల పేరుతో వచ్చే నకిలీ లింకులను ఎట్టి పరిస్థితుల్లోనూ క్లిక్ చేయవద్దు. ఎల్లప్పుడూ అధికారిక యాప్ లేదా వెబ్‌సైట్ నుంచే కొనుగోలు చేయండి.

అడ్వాన్స్ వద్దు: వస్తువును బుక్ చేసుకోవడానికి కొంత మొత్తం అడ్వాన్స్‌గా కట్టాలని అడిగితే, అది కచ్చితంగా మోసమేనని గ్రహించండి. క్యాష్ ఆన్ డెలివరీ ఆప్షన్‌ను ఎంచుకోవడం ఉత్తమం.

మోసపోతే ఏం చేయాలి : ఒకవేళ మీరు ఆన్‌లైన్‌లో మోసపోయినట్లు గుర్తిస్తే, ఏమాత్రం ఆలస్యం చేయకుండా, వెంటనే జాతీయ సైబర్ క్రైమ్ హెల్ప్‌లైన్ నంబర్ 1930కు కాల్ చేయండి లేదా cybercrime.gov.in వెబ్‌సైట్‌లో ఫిర్యాదు చేయండి. ఎంత త్వరగా స్పందిస్తే, పోగొట్టుకున్న డబ్బును తిరిగి పొందే అవకాశాలు అంత ఎక్కువగా ఉంటాయి.
ఆఫర్లు ఉన్నాయని కాకుండా, మనకు నిజంగా అవసరమా అని ఆలోచించి, ధరలను సరిపోల్చుకుని కొనుగోలు చేయడమే తెలివైన వినియోగదారుడి లక్షణం.