PF : పీఎఫ్ ఖాతాదారులు, ఉద్యోగులు ఊపిరి పీల్చుకునే శుభవార్త. ఉద్యోగుల భవిష్య నిధి (EPF) నుంచి డబ్బు ఉపసంహరణ విషయంలో కేంద్ర ప్రభుత్వం ఒక చారిత్రక నిర్ణయం తీసుకుంది. గతంలో ఉన్న సంక్లిష్టమైన నిబంధనలకు స్వస్తి పలికి, పీఎఫ్ విత్‌డ్రాలను అత్యంత సులభతరం చేసింది.ఇకపై ఉద్యోగులు తమ పీఎఫ్ డబ్బు కోసం ఏళ్ల తరబడి వేచి చూడాల్సిన అవసరం లేదు. కేవలం 12 నెలల సర్వీసు పూర్తి చేసిన వెంటనే, ఖాతాలో ఉన్న మొత్తం బ్యాలెన్స్‌లో 75 శాతం వరకు విత్‌డ్రా చేసుకునే సువర్ణావకాశం లభించింది.

ఒకే గొడుగు కింద 13 నిబంధనలు రద్దు
కేంద్ర కార్మిక, ఉపాధి మంత్రిత్వ శాఖ చేసిన ఈ మార్పులు ఉద్యోగులకు భారీ ఊరటనిచ్చాయి. పాత విధానంలో ఉన్న 13 రకాల పాక్షిక ఉపసంహరణ నిబంధనలను రద్దు చేసి, వాటన్నింటినీ ఒకే ‘సరళీకృత విధానం’ కిందకు తీసుకువచ్చారు.

ప్రధాన మార్పులు ఇవే:
అర్హత కాలం తగ్గింపు: గతంలో వేర్వేరు రకాల విత్‌డ్రాలకు ఏడేళ్ల వరకు ఉన్న అర్హత కాలాన్ని… ఇప్పుడు అన్ని రకాల ఉపసంహరణలకూ ఒకే విధంగా 12 నెలలకు కుదించారు.

యజమాని వాటా కూడా: ఇది అత్యంత ముఖ్యమైన మార్పు. ఇకపై ఉద్యోగి విత్‌డ్రా చేసుకునే 75 శాతం మొత్తంలో, యజమాని (Employer) వాటాను కూడా పరిగణనలోకి తీసుకుంటారు. గతంలో కేవలం ఉద్యోగి వాటా మాత్రమే లభించేది. ఈ మార్పు కారణంగా, ఉద్యోగి చేతికి అందే మొత్తం గతంలో కంటే చాలా ఎక్కువగా ఉంటుంది.

నిరుద్యోగులకూ వెంటనే 75%: ఉద్యోగం కోల్పోయిన (నిరుద్యోగం) సందర్భంలో కూడా ఉద్యోగులు తమ పీఎఫ్ బ్యాలెన్స్‌లో 75 శాతం మొత్తాన్ని వెంటనే విత్‌డ్రా చేసుకునేందుకు అవకాశం కల్పించారు.

దీర్ఘకాలిక భద్రతకు భరోసా
పీఎఫ్ నిబంధనలు సరళీకరించినప్పటికీ, ఉద్యోగుల భవిష్యత్తు సామాజిక భద్రతను కేంద్రం విస్మరించలేదు. అందుకే, రెండు ముఖ్యమైన అంశాలపై దృష్టి సారించింది.

25 శాతం తప్పనిసరి బ్యాలెన్స్: పదవీ విరమణ సమయానికి ఉద్యోగి ఖాతాలో గౌరవప్రదమైన మొత్తం మిగిలి ఉండేలా, కనీసం 25 శాతం బ్యాలెన్స్‌ను తప్పనిసరిగా ఖాతాలో ఉంచాలన్న నిబంధనను కొనసాగించింది.

పెన్షన్ విత్‌డ్రా గడువు పెంపు: పెన్షన్ (EPS) ప్రయోజనాలు ఎక్కువ మందికి దక్కాలనే ఉద్దేశంతో, పెన్షన్ ఖాతాలోని డబ్బును విత్‌డ్రా చేసుకునేందుకు గతంలో ఉన్న 2 నెలల గడువును ఏకంగా 36 నెలలకు (3 సంవత్సరాలు) పెంచారు. పదేళ్ల సర్వీసు పూర్తి చేస్తేనే పెన్షన్‌కు అర్హత లభిస్తుంది. ఈ 36 నెలల గడువు వల్ల, ఎక్కువ మంది ఉద్యోగులు పెన్షన్ అర్హతను సాధించేందుకు అవకాశం లభిస్తుంది. ఈ మార్పు పింఛ‌న్ అర్హతపై ఎటువంటి ప్రభావం చూపదని ప్రభుత్వం స్పష్టం చేసింది.

మొత్తం మీద, ఈ కొత్త నిబంధనలు పీఎఫ్ ఖాతాదారులకు అత్యవసర సమయాల్లో ఆర్థిక భరోసాను ఇవ్వడంతో పాటు, విధానాన్ని మరింత పారదర్శకంగా, ఉద్యోగి-కేంద్రీకృతంగా మార్చాయి. ఉద్యోగులు ఇకపై తమ కష్టార్జితాన్ని త్వరగా, సులభంగా పొందే వీలు చిక్కింది.