CBSE CCTV Guidelines: పాఠశాల ఆవరణ… పిల్లల భవిష్యత్తుకు బంగారు బాటలు వేసే పవిత్ర ప్రదేశం. కానీ, అదే ప్రాంగణంలో వారి భద్రత ప్రశ్నార్థకమైతే..? ఈ ఆందోళనకే చెక్ పెడుతూ, విద్యార్థుల సంరక్షణే పరమావధిగా సెంట్రల్ బోర్డ్ ఆఫ్ సెకండరీ ఎడ్యుకేషన్ (CBSE) ఓ కీలక ముందడుగు వేసింది. దేశవ్యాప్తంగా సీబీఎస్ఈ అనుబంధ పాఠశాలల్లో భద్రతా ప్రమాణాలను కఠినతరం చేస్తూ సంచలన ఆదేశాలు జారీ చేసింది. అసలు ఏయే ప్రదేశాల్లో ఈ నిఘా నేత్రాన్ని తప్పనిసరి చేశారు..? వాటి ప్రత్యేకతలేంటి? ఈ నిబంధనల వెనుక ఉన్న అసలు ఉద్దేశం ఏమిటి..?
ప్రతి మూల కెమెరా నీడలో:
పాఠశాలల్లో విద్యార్థుల శారీరక, మానసిక భద్రతను పెంపొందించే లక్ష్యంతో సీబీఎస్ఈ తన అఫిలియేషన్ బై-లాస్‌లోని చాప్టర్-4ను సవరించింది. ఈ మేరకు సీబీఎస్ఈ కార్యదర్శి హిమాన్షు గుప్తా అన్ని అనుబంధ పాఠశాలలకు స్పష్టమైన ఉత్తర్వులు జారీ చేశారు.
ఎక్కడెక్కడ తప్పనిసరి:
టాయిలెట్లు, వాష్‌రూమ్‌లు మినహా, పాఠశాలలోని దాదాపు అన్ని వ్యూహాత్మక ప్రదేశాలను సీసీ కెమెరాల నిఘా కిందకు తీసుకురావాలని బోర్డు స్పష్టం చేసింది.
ప్రవేశ, నిష్క్రమణ ద్వారాలు (Entrance & Exit Points)
లాబీలు, కారిడార్లు
అన్ని తరగతి గదులు
ల్యాబ్‌లు, లైబ్రరీ
క్యాంటీన్, స్టోర్ రూమ్
మెట్లు (Staircases)
ఆట స్థలాలు (Playgrounds)
ALSO READ: https://teluguprabha.net/career-news/ib-acio-2025-exam-pattern-selection-process/
కెమెరాలకు ఉండాల్సిన ప్రత్యేకతలు: సాధారణ కెమెరాలు సరిపోవని, కచ్చితమైన ప్రమాణాలతో కూడిన నిఘా వ్యవస్థ ఉండాలని బోర్డు తేల్చిచెప్పింది.
హై-రిజల్యూషన్: దృశ్యాలు అత్యంత స్పష్టంగా కనిపించేలా హై-రిజల్యూషన్ కెమెరాలనే వాడాలి.
ఆడియో-విజువల్ సౌకర్యం: కేవలం దృశ్యాలే కాకుండా, శబ్దాలను కూడా రికార్డ్ చేసే (Audio-Visual) సౌకర్యం తప్పనిసరిగా ఉండాలి.
డేటా బ్యాకప్: రికార్డ్ అయిన ఫుటేజీని కనీసం 15 రోజుల పాటు భద్రపరిచేలా (బ్యాకప్) ఏర్పాట్లు చేయాలి.
ALSO READ: https://teluguprabha.net/career-news/telugu-university-admissions-film-direction-magic/
ఆదేశాల వెనుక అసలు లక్ష్యం:
ఈ కఠిన నిబంధనల వెనుక బలమైన కారణం ఉంది. 2021 సెప్టెంబర్‌లో జాతీయ బాలల హక్కుల పరిరక్షణ కమిషన్ (NCPCR) జారీ చేసిన ‘పాఠశాలల్లో పిల్లల భద్రత, భద్రతపై మాన్యువల్’కు అనుగుణంగానే ఈ నిర్ణయం తీసుకున్నట్లు సీబీఎస్ఈ తెలిపింది. విద్యార్థులను బెదిరింపులు (Bullying), వేధింపుల నుంచి రక్షించడం, వారి సమగ్ర అభివృద్ధికి సురక్షితమైన, భయరహిత వాతావరణాన్ని కల్పించడం, మరియు సాంకేతిక పరిజ్ఞానాన్ని ఉపయోగించి అవాంఛనీయ సంఘటనలను నివారించడం ఈ చర్యల ముఖ్య ఉద్దేశమని సీబీఎస్ఈ కార్యదర్శి హిమాన్షు గుప్తా తన ప్రకటనలో పేర్కొన్నారు.
