Indrani Davuluri :భారతీయ నృత్య కళల పట్ల అపారమైన మక్కువతో, శిక్షకురాలిగా ఉన్న ఇంద్రాణి దావులూరి తొలిసారి దర్శకత్వం వహించి, నటించి, నిర్మించిన చిత్రం ‘అందెల రవమిది’, అక్టోబర్ 11న ప్రేక్షకుల ముందుకు వచ్చింది. కె. విశ్వనాథ్ వంటి దిగ్గజాలు అందించిన ‘శంకరాభరణం’, ‘సాగర సంగమం’ వంటి కళాత్మక చిత్రాల స్ఫూర్తిని ఈ తరం ప్రేక్షకులకు అందించే రిస్క్‌ను ఇంద్రాణి తీసుకున్నారు.
కథ:
సినిమా కథానాయిక పావని (ఇంద్రాణి దావులూరి), తన నృత్య ప్రతిభను ప్రపంచ స్థాయిలో నిరూపించుకోవాలని కలలు కనే నర్తకి. అనుకోని పరిస్థితుల్లో రమేశ్ (విక్రమ్ కొల్లూరు)తో వివాహం తర్వాత అమెరికాలో స్థిరపడుతుంది. పావని పట్టుదలను గమనించిన రమేశ్, ఆమెకు డాన్స్ స్కూల్ ప్రారంభించడానికి అండగా నిలుస్తాడు. అయితే, పిల్లలు వద్దనుకున్న వారికి, అనూహ్యంగా పావనికి జరిగిన ఆపరేషన్ వల్ల పిల్లలు పుట్టరని తెలుస్తుంది. వంశ గౌరవం కోసం రమేశ్ రెండో పెళ్లి చేసుకుంటాడా? పావని తన కలను నెరవేర్చుకుందా? అనే భావోద్వేగ సంఘర్షణే ఈ సినిమా.
విశ్లేషణ:
నేటి AI జనరేషన్ వేగవంతమైన యుగంలో, నెమ్మదిగా సాగే ఇలాంటి కళాత్మక కథలకు ఆదరణ దక్కడం కష్టమే. అయినప్పటికీ, అనుకున్న లక్ష్యాన్ని సాధించడానికి ఎన్ని కష్టాలనైనా ఎదుర్కోవాలనే ఆలోచనను దర్శకురాలు ఆసక్తికరమైన స్క్రీన్‌ప్లేతో చూపించారు. ఇంద్రాణి దావులూరి నటనలో, ముఖ్యంగా ఎమోషనల్ సీన్స్‌లో చక్కటి అభినయాన్ని ప్రదర్శించి మెప్పించారు. నటిగా, దర్శకురాలిగా ఆమె చేసిన ఈ సాహసాన్ని తప్పక మెచ్చుకోవాలి. వెంకటేశ్ పట్వారీ అందించిన సంగీతం, అమెరికా లొకేషన్స్‌లో సినిమాటోగ్రఫీ బాగా కుదిరాయి.
ఓవరాల్‌గా: ‘అందెల రవమిది’ కేవలం సినిమా కాదు, ఇది భారతీయ నృత్య కళల పట్ల ఉన్న ప్రేమకు, లక్ష్య సాధనలో రాజీ పడని తత్వానికి నిదర్శనం. ఇది కమర్షియల్ హంగులు ఆశించకుండా, కళాత్మక చిత్రాలను ఆదరించే ప్రేక్షకులకు మెచ్చుకోదగ్గ ప్రయత్నం.
