బిగ్ బాస్ సీజన్ 6 ప్రస్తుతం 11 వారాలు పూర్తిచేసుకుని 12వ వారం జరుపుకుంటోంది. ఈవారమంతా హౌస్ ఎమోషన్స్ తో నిండిపోతోంది. ఫ్యామిలీ మీట్స్ కావడంతో.. ఒక్కొక్కరు తమ వాళ్లని చూసి ఎమోషనల్ అవుతున్నారు. ఇప్పటికి హౌస్ లో 9 మంది సభ్యులున్నారు. రేవంత్, శ్రీహాన్, ఆదిరెడ్డి, రాజ్, ఇనయ, ఫైమా, రోహిత్, శ్రీసత్య, కీర్తిలు టాప్ 9 కంటెస్టంట్లుగా నిలిచారు. ఇప్పటి వరకూ ఆదిరెడ్డి, రాజ్, ఫైమా, రోహిత్, శ్రీసత్య ల కుటుంబ సభ్యులు హౌస్ లోకి వచ్చారు.
అందరితో ఆప్యాయంగా కలిసిపోయారు వారంతా. ఈరోజు ఎపిసోడ్ లో శ్రీహాన్ కోసం సిరి వస్తుంది. ఈ ఎపిసోడ్ కోసం ఆడియన్స్ ఈగర్ గా ఎదురుచూస్తున్నారు. మరి కీర్తి కోసం ఎవరొస్తున్నారు ? ఒక ప్రమాదంలో తన కుటుంబాన్ని మొత్తం కోల్పోయిన కీర్తి.. తనకు సర్జరీ కావడంతో అమ్మయ్యే అవకాశాన్నీ కోల్పోయింది. కీర్తి గురించి తెలిసిన వారంతా పగవాళ్లకి కూడా ఇంతకష్టం రాకూడదనుకుంటారు. తల్లిదండ్రుల్ని కోల్పోయాక.. బంధువుల టార్చర్ భరించలేక అక్కడి నుంచి వచ్చేసిన ఆమె, ఒంటరిగా తన జీవన పోరాటాన్ని కొనసాగిస్తోంది. తనకంటూ ఎవరూ లేరనే విషయాన్ని ఆమె తరచూ ప్రస్తావిస్తూనే ఉంటుంది.
ఈ విషయంపై శ్రీహాన్-కీర్తి లకు చాలాసార్లు గొడవయింది. శ్రీ సత్యను చూడటానికి ఆమె తల్లి .. రోహిత్ ను చూడటానికి అతని తల్లి .. ఫైమాను చూడటానికి ఆమె తల్లి హౌస్ కి వచ్చారు. అప్పుడు తల్లీ బిడ్డల మధ్య ఉండే ఆ ఆనందాన్ని చూసి కీర్తి కన్నీళ్లు పెట్టుకుంది. టీవీల ముందు కూర్చుని షో చూస్తున్న వారు కీర్తిని చూసి కంటతడి పెట్టుకుంటున్నారు. కీర్తిని కలిసి ధైర్యం చెప్పేందుకు.. ఆమె సహాయ నటుడు మహేష్ (మనసిచ్చిచూడు సీరియల్) వస్తున్నాడు.
