Game Changer Teaser| గ్లోబల్ స్టార్ రామ్ చరణ్‌(Ram Charan) హీరోగా, దిగ్గజ దర్శకుడు శంకర్ దర్శకత్వంలో తెరకెక్కుతున్న ‘గేమ్ ఛేంజర్’ మూవీ టీజర్ రిలీజ్ చేశారు మేకర్స్. టీజర్ లాంఛ్ ఈవెంట్ ఉత్తరప్రదేశ్ రాజధాని లక్నోలో గ్రాండ్‌గా నిర్వహించారు.
“బేసిక్‌గా రామ్ అంత మంచోడు ఇంకోడు లేడు. కానీ వాడికి కోపం వస్తే.. వాడంత చెడ్డోడు ఇంకోడు ఉండడు” అనే డైలాగ్‌తో టీజర్ ప్రారంభమైంది. టీజర్‌లో యాక్షన్ సీన్స్, డ్యాన్స్, సాంగ్స్ ఆకట్టుకున్నాయి. ముఖ్యంగా ‘గేమ్ ఛేంజర్’ మూవీ టైటిల్ పడే సమయంలో చెస్ గేమ్ ఆకట్టుకుంటుంది. మొత్తానికి ఈ టీజర్ మెగా అభిమానులకు కిక్ ఇస్తుందనే చెప్పాలి.
కాగా పొలిటికల్ డ్రామా బ్యాక్ డ్రాప్‌లో తెరకెక్కతున్న ఈ సినిమాను ప్రముఖ సినీ నిర్మాత దిల్ రాజు దాదాపుగా రూ.350 కోట్ల భారీ బడ్జెట్‌తో నిర్మిస్తున్నారు. ఇక ఈ సినిమాలో చెర్రీ సరసన కియారా అద్వానీ నటిస్తుండగా.. ఎస్.జె సూర్య, నవీన్ చంద్ర, అంజలి, సముద్రఖని, శ్రీకాంత్, సునీల్ తదితరులు కీలక పాత్రలు పోషిస్తున్నారు. ఎస్.థమన్ సంగీతం అందిస్తున్నాడు. ఇప్పటికే విడుదలైన రెండు పాటలు ప్రేక్షకులను ఆకట్టుకున్నాయి. వచ్చే ఏడాది సంక్రాంతి పండుగ కానుకంగా ఈ సినిమా జనవరి 10న విడుదల కానుంది.
