స్టార్ హీరో ఎన్టీఆర్ బావమరిది నార్నే నితిన్(Narne Nithin) వరుస సినిమాలతో మంచి జోరు మీద ఉన్నాడు. అతడు నటించిన మ్యాడ్, మ్యాడ్ 2, ఆయ్ చిత్రాలు విజయాలు అందుకున్న సంగతి తెలిసిందే. ఈ సినిమాలతో యువతో ఫాలోయింగ్ తెచ్చుకున్న అతడు.. ప్రస్తుతం ‘శ్రీ శ్రీ శ్రీ రాజావారు’ అనే చిత్రంలో నటిస్తున్నాడు. ‘శతమానం భవతి’ మూవీ దర్శకుడు సతీష్ వేగేశ్న ద‌ర్శక‌త్వం వ‌హిస్తున్న ఈ సినిమాను శ్రీ వేదాక్షర మూవీస్ పతాకంపై చింతపల్లి రామారావు నిర్మిస్తున్నారు.
తాజాగా విడుదల చేసిన ఈ మూవీ ట్రైలర్ ఆసక్తిగా ఉంది. సిగరెట్‌కి అల‌వాట‌యిన ఒక యువ‌కుడి చుట్టూ క‌థ ఉండ‌బోతున్నట్లు ట్రైలర్‌లో చూపించారు. ఇక ఈ చిత్రంలో రావు రమేష్, శుభలేఖ సుధాకర్, నరేష్, రఘు కుంచె, ప్రవీణ్, రచ్చ రవి, సరియు, రమ్య, ప్రియ మచిరాజు, భద్రం, ఆనంద్, జబర్దస్త్ నాగి తదితరులు కీలక పాత్రల్లో న‌టిస్తున్నారు. కైలాష్ మీనన్ సంగీతం అందిస్తున్నాడు. కాగా జూన్ 6న ఈ మూవీ ప్రేక్షకుల ముందుకు రాబోతుంది.
