సూప‌ర్ స్టార్ మహేశ్ బాబు(Mahesh Babu), ద‌ర్శ‌క‌దీరుడు రాజమౌళి(Rajamouli) ద‌ర్శ‌క‌త్వంలో పాన్ వరల్డ్ స్థాయిలో ఓ చిత్రం(SSMB 29) తెర‌కెక్క‌నున్న సంగ‌తి తెలిసిందే. ప్రేక్షకులతో పాటు ఇండస్ట్రీ ప్రముఖులు కూడా ఈ సినిమా కోసం ఆతృతగా ఎదురుచూస్తున్నారు. ఇటీవలే పూజా కార్యక్రమాలను జరుపుకున్న ఈ మూవీ షూటింగ్ త్వరలోనే జరగనుంది. తాజాగా షూటింగ్‌కు సంబంధించిన హింట్ ఇస్తూ జక్కన్న పోస్ట్ పెట్టాడు. ఇందులో రాజమౌళి పాస్ పోర్టు పెట్టుకుని.. సింహాన్ని బంధించినట్లుగా ఉంది. దీంతో సినిమా రెగ్యులర్ షూటింగ్ ప్రారంభమైందని.. మహేశ్ బాబును బంధించానని అర్థం వచ్చేలా ఈ పోస్ట్ పెట్టినట్లు తెలుస్తోంది.
అయితే రాజమౌళి పోస్టుకు మ‌హేశ్‌బాబు, ప్రియాంక చోప్రా(Priyanka Chopra)లు స్పందించ‌డం గ‌మ‌నార్హం. మహేశ్ పోకిరి సినిమాలోని ‘ఒక్క‌సారి క‌మిట్ అయితే.. నా మాట నేనే విన‌ను’ డైలాగ్ కామెంట్ చేయగా.. ‘ఫైన‌ల్’లీ అంటూ ప్రియాంక చోప్రా న‌వ్వుతున్న ఎమోజీని షేర్ చేసింది. ఈ నేపథ్యంలో ఈ సినిమాలో ప్రియాంక చోప్రా హీరోయిన్‌గా నటించడం ఖాయమని అర్థమవుతోంది. ఇప్పటికే ప్రియాంక గత కొద్ది రోజులుగా హైదరాబాద్‌లోనే ఉంటున్నారు. కాగా భారీ బడ్జెట్‌తో అమెజాన్‌ అడవుల నేపథ్యంలో సాగే ఈ చిత్రానికి ‘గ‌రుడ’ అనే టైటిల్ ప‌రిశీల‌న‌లో ఉన్న‌ట్లు తెలుస్తోంది. ఈ చిత్రంలో ప‌లువురు హాలీవుడ్ న‌టీన‌టుల‌తో పాటు టెక్నీషియ‌న్లు భాగం కానున్నారు.
