Chiranjeevi| యువ హీరో కిరణ్ అబ్బవరం(Kiran Abbavaram) హీరోగా నటించిన ‘క'(KA Movie) మూవీ దీపావళి పండుగ కానుకగా విడుదలై సూపర్ హిట్ అయిన సంగతి తెలిసిందే. తాజాగా మెగాస్టార్ చిరంజీవి (Chiranjeevi) ఈ చిత్రాన్ని చూసి మూవీ యూనిట్‌ని మెచ్చుకున్నారు. ఆదివారం తన నివాసంలో చిత్రబృందాన్ని ప్రత్యేకంగా కలిసి వారిని అభినందించారు. ఈ విషయాన్ని కిరణ్ అబ్బవరం తెలియజేస్తూ ఎక్స్ వేదికగా ఓ పోస్ట్ పెట్టారు.
‘‘బాస్‌ నుంచి ప్రశంసలు. దాదాపు గంటకు పైగా తన విలువైన సమయం మాకోసం కేటాయించి.. ఎన్నో గొప్ప విషయాలు పంచుకున్నందుకు థ్యాంక్యూ చిరంజీవి గారు. ఈ భేటీని ఎప్పటికీ గుర్తుపెట్టుకుంటా. మిమ్మల్ని కలిసిన ప్రతిసారీ నాకెంతో ప్రత్యేకంగా అనిపిస్తుంది. ఓ ఆశీర్వాదంగా భావిస్తున్నాను’’ అని పోస్టులో రాసుకొచ్చారు.
కాగా 1970 బ్యాక్‌డ్రాప్‌లో తెరకెక్కిన ఈ మూవీని సుజీత్, సందీప్ సంయుక్తంగా దర్శకత్వం వహించారు. ఈ సినిమాతో కిరణ్ పాన్ ఇండియా హీరోల లిస్టులో చేరాడు. ఇప్పటికే ఈ సినిమా చూసిన పలువురు ప్రముఖులు మూవీ యూనిట్‌ని అభినందించారు. ఇదిలా ఉంటే ఇటీవల ‘లక్కీ భాస్కర్’ మూవీ దర్శకుడు వెంకీ అట్లూరిని కూడా చిరంజీవి అభినందించిన సంగతి తెలిసిందే.
