Mrunal Thakur: అల్లు అర్జున్ హీరోగా నటిస్తోన్న AA26XA6 మూవీలో అందాల తార మృణాళ్ ఠాకూర్ నటించనున్నట్లు ఇదివరకే వార్తలు వచ్చాయి. అట్లీ డైరెక్ట్ చేస్తోన్న ఈ మూవీ షూటింగ్‌లో ఆమె జాయిన్ అయినట్లు విశ్వసనీయ సమాచారం అందింది. మృణాల్ ఠాకూర్ ఇప్పుడు తన కెరీర్‌లోనే అతి పెద్ద సినిమాని చేస్తోంది. అల్లు అర్జున్‌తో ఆమె స్క్రీన్‌ను పంచుకుంటోంది. ఈ మూవీలో దీపికా పడుకోనే మెయిన్ హీరోయిన్‌గా నటిస్తుండగా, మృణాల్ ఒక కీలక పాత్రను చేస్తోందని సమాచారం. ముంబైలో ప్రత్యేకంగా రూపొందించిన వీఎఫ్ఎక్స్ స్టూడియోలో మృణాల్‌కు సంబంధించిన సన్నివేశాలను తీస్తున్నారు. ఒక యాక్షన్ సీన్ కోసం అక్కడ షూటింగ్ చేస్తున్నట్లు తెలుస్తోంది.
“ఇదొక భారీ యాక్షన్ ఎపిసోడ్. ఈ షెడ్యూల్లో అల్లు అర్జున్‌తో కలిసి మృణాల్ షూటింగ్‌లో పాల్గొంటోంది” అని విశ్వసనీయ వర్గాలు తెలిపాయి. నిజానికి, కొన్ని నెలల క్రితమే ఈ మూవీలో మృణాల్ భాగమైన విషయాన్ని అధికారికంగా ప్రకటించాలని నిర్మాతలు భావించారు. కానీ కొన్ని కారణాల వల్ల దాన్ని వాయిదా వేశారు. ఇప్పుడు ఆమె షూటింగ్‌లో పాల్గొంటున్నది కాబట్టి త్వరలోనే అధికారిక ప్రకటన రావచ్చు.
AA26XA6 చిత్రంలో ఎక్కువ భాగం షూటింగ్ ముంబైలో జరగనుంది. అందిన సమాచారం ప్రకారం ముంబై షెడ్యూల్ ఏకంగా 130 రోజుల పాటు కొనసాగనుంది. ఈ సినిమాకి పనిచేయడానికి ఇప్పటికే ఇంటర్నేషనల్ టెక్నీషియన్ల బృందం ముంబైకి చేరుకుంది. తన కెరీర్‌లోనే తొలిసారిగా అల్లు అర్జున్ ఈ మూవీలో డ్యూయల్ రోల్ చేస్తున్నారు. యాక్షన్ మేళవించిన సైన్స్-ఫిక్షన్ థ్రిల్లర్‌గా తయారవుతున్న ఇందులో ఆయన రెండు భిన్నమైన లుక్స్‌లో కనిపించనున్నారు. లాయిడ్ స్టీవెన్స్ శిక్షణలో ఆయన మేకోవర్ అయ్యారు కూడా. వీఎఫ్ఎక్స్, ఏఐ టెక్నాలజీని ఎక్కువగా ఉపయోగిస్తున్న ఈ మూవీని సన్ పిక్చర్స్ బ్యానర్‌పై కళానిధి మారన్ నిర్మిస్తున్నారు.
