Director Shiva Nirvana: యంగ్ హీరో నాగచైతన్య అక్కినేని ప్రస్తుతం దర్శకుడు కార్తీక్ దండుతో కలిసి ఓ మైథలాజికల్ థ్రిల్లర్ సినిమా చేస్తున్న సంగ‌తి తెలిసిందే. ఈ ప్రాజెక్ట్ చైతన్య కెరీర్‌లో 24వ సినిమా. ప్రస్తుతం ఈ సినిమా షూటింగ్ దశలో ఉంది.. శ‌ర‌వేగంగా చిత్రీక‌ర‌ణ జ‌రుగుతోంది. ఈ సినిమా సెట్స్‌పై ఉండ‌గానే అక్కినేని క‌థానాయ‌కుడు తన 25వ చిత్రానికి సైతం సన్నాహాలు ప్రారంభించారు. ఈ ప్రాజెక్ట్‌కు శివ నిర్వాణ దర్శకత్వం వహించనున్నాడు. ఇదివరకు నాగచైతన్య, శివ నిర్వాణల కాంబినేషన్‌లో వచ్చిన ‘మజిలీ’ చిత్రం మంచి విజయం సాధించింది. చైతన్య కెరీర్‌లో వ‌న్ ఆఫ్ ది బెస్ట్ మూవీగా మజిలీ నిలిచింది.
శివ నిర్వాణ త‌దుప‌రి సినిమాను నేచుర‌ల్ స్టార్ నానితో కలిసి ‘టక్ జగదీష్’ మూవీ చేశాడు. అయితే ఆ మూవీ మాత్రం ఆశించిన స్థాయిలో హిట్ కాలేదు. ఆ త‌ర్వాత ఈ డైరెక్ట‌ర్ మ‌రో సినిమాను చేయ‌లేదు. మ‌రో మంచి కథను సిద్ధం చేసుకుని మళ్లీ మెప్పించే కథ కోసం ప్రయత్నాలు చేస్తున్నాడు. తాజా ప్రాజెక్ట్‌కి కూడా ఫీల్ గుడ్ ఎమోషన్‌తో పాటు కొద్దిపాటి యాక్షన్‌ను మేళవించి కథను సిద్ధం చేసినట్టు సమాచారం. ఈ ఏడాది చివర్లో ఈ సినిమా ప్రారంభమయ్యే అవకాశాలున్నాయి. చిత్ర పరిశ్రమ వర్గాల ప్రకారం, శివ చెప్పిన కథ చైతన్యకు నచ్చడంతో వెంటనే గ్రీన్ సిగ్నల్ ఇచ్చినట్టు తెలుస్తోంది. గత రెండేళ్లుగా ఈ కాంబినేషన్‌పై చర్చలు జరుగుతున్నాయి. చివరకు 25వ చిత్రంగా ఈ కథను మొదలుపెట్టాలని నిర్ణయించారు. నాగ చైతన్య హీరోగా శివ నిర్వాణ ద‌ర్శ‌క‌త్వంలో మైత్రీ మూవీ మేకర్స్ ఈ చిత్రాన్ని నిర్మించబోతున్నారు. ఇప్పటికే హీరో, దర్శకుడికి అడ్వాన్స్ ఇచ్చినట్టు సమాచారం. ప్రస్తుతం శివ నిర్వాణ డైలాగ్ వెర్షన్‌పై పని చేస్తున్నారని సినీ వర్గాల సమాచారం.
ప్రస్తుతం నాగచైతన్య చేస్తోన్న 24వ సినిమా విష‌యానికి వ‌స్తే ఈ మూవీని విరూపాక్ష ఫేమ్‌ కార్తీక్ దండుతో చైతన్య చేస్తున్నాడు. ఈ ప్రాజెక్ట్ మైథలాజికల్ థ్రిల్లర్ అని తెలిసింది. ‘వృషకర్మ’ అనే టైటిల్‌ను పరిగణనలోకి తీసుకుంటున్నారు. విరూపాక్ష త‌ర‌హాలోనే కార్తీక్ దండు తన రెండో సినిమాను తెరకెక్కిస్తున్నాడని టాక్. ఈ సినిమా కోసం అన్నపూర్ణ స్టూడియోలో భారీ సెట్ వేసి, ఇప్పటికే అక్కడ కొంతమేర షూటింగ్ కూడా పూర్తి చేశారు. మీనాక్షి చౌదరి ఈ చిత్రంలో కథానాయికగా నటిస్తున్నారు. చైతన్య గత చిత్రం తండేల్‌.. చందు మొండేటి ద‌ర్శ‌క‌త్వంలో సాయిప‌ల్ల‌వి హీరోయిన్‌గా న‌టించింది. ఈ చిత్రంతో తో మంచి స‌క్సెస్‌ను సొంతం చేసుకున్నాడు చైతన్య. ఇప్పుడు వృష‌క‌ర్మ‌పై మంచి అంచ‌నాలు ఏర్ప‌డ్డాయి.