Pushpa2| ప్రస్తుతం ‘పుష్ప’ మేనియా నడుస్తోంది. సుకుమార్ దర్శకత్వంలో ఐకాన్ స్టార్ అల్లు అర్జున్(Allu Arjun) హీరోగా నటించిన ‘పుష్ప2’ చిత్రం రికార్డులు సృష్టిస్తోంది. ఇప్పటికే విడుదలైన సినిమా ట్రైలర్ విడుదలైన నాటి నుంచి ట్రెండింగ్‌లో ఉంది. 120 మిలియన్ల వ్యూస్‌తో టాప్‌ వన్‌లో కొనసాగుతోంది. తాజాగా మరో రికార్డును తన ఖాతాలో వేసుకుంది. ఓవర్సీస్‌లో అత్యంత వేగంగా వన్ మిలియన్ డాలర్ల క్లబ్‌లోకి చేరింది. ఓవర్సీస్‌లో ఒకరోజు ముందుగానే డిసెంబర్‌ 4న ప్రేక్షకుల ముందుకురానుంది. దీంతో అమెరికన్‌ బాక్సాఫీస్‌లో అత్యంత వేగంగా ప్రీసేల్ ద్వారానే వన్ మిలియన్ డాలర్ల మార్క్‌ను చేరిన సినిమాగా ‘పుష్ప2’ నిలిచింది.
ఈమేరకు చిత్ర నిర్మాణ సంస్థ మైత్రీ మూవీ మేకర్స్ సోషల్ మీడియా వేదికగా పోస్ట్‌ పెట్టింది. ‘మరో రోజు.. మరో రికార్డుతో చరిత్ర సృష్టించాడు. బాక్సాఫీస్‌ వద్ద పుష్పరాజ్‌ హవా కొనసాగుతూనే ఉంటుంది’ అంటూ కొత్త పోస్టర్‌ను విడుదల చేసింది. దీంతో సినిమా విడుదలయ్యాక మరిన్ని రికార్డులు ఖాయం అని ఫ్యాన్స్ కామెంట్స్‌ పెడుతున్నారు. ఇదిలా ఉంటే అమెరికాలో ఏకంగా 3,230 షోలను ప్రదర్శించనున్నారు. విడుదలకు ఇంకా సమయం ఉండడంతో షోల సంఖ్య మరింత పెరిగే అవకాశమున్నట్లు తెలుస్తోంది.