విక్టరీ వెంకటేష్ (Venkatesh) హీరోగా, ప్రముఖ దర్శకుడు అనిల్ రావిపూడి కాంబోలో తెరకెక్కిన ‘సంక్రాంతికి వస్తున్నాం’(Sankranthiki Vasthunnam) బాక్సాఫీస్ వద్ద పాజిటివ్ టాక్ దక్కించుకుంది. ఫ్యామిలీ ఆడియన్స్‌కు ఈ సినిమా విపరీతంగా నచ్చింది. దీంతో మూవీకి వసూళ్ల వర్షం కురుస్తోంది. తాజాగా ఈ చిత్రం రూ.100కోట్లకు పైగా వసూళ్లు సాధించి రికార్డు సృష్టించింది.
తొలి రోజు రూ.45 కోట్ల గ్రాస్ వ‌సూళ్ల‌ను సాధించగా.. రెండో రోజు రూ.32 కోట్ల గ్రాస్ వ‌సూళ్ల‌ను రాబ‌ట్టటగా.. మూడో రోజు రూ.29 కోట్ల మొత్తాన్ని క‌లెక్ట్ చేసింది. మొత్తంగా మూడు రోజుల్లో ఈ చిత్రం రూ.106 కోట్లకు పైగా గ్రాస్ వ‌సూళ్ల‌ను రాబ‌ట్టిన‌ట్లు చిత్ర బృందం అధికారికంగా ప్రకటించింది. ‘ఎనీ సెంట‌ర్‌, సింగిల్ హ్యాండ్ విక్టరీ వెంకటేష్’ అంటూ పోస్ట‌ర్‌ను విడుద‌ల చేసింది. ప్ర‌స్తుతం సంక్రాంతి సెల‌వులు మరో మూడు రోజులు ఉండ‌డంతో ఈ చిత్రం భారీ క‌లెక్ష‌న్లు సాధించే అవ‌కాశం ఉన్న‌ట్లు సినీ విశ్లేష‌కులు చెబుతున్నారు.
కాగా వెంకీ, అనిల్ కాంబోలో వ‌చ్చిన ‘ఎఫ్2’, ‘ఎఫ్ 3’ తర్వాత ఈ సినిమా కూడా సూపర్ హిట్ కావడంతో అభిమానులు సంతోషం వ్యక్తం చేస్తున్నారు. ఇక ఈ చిత్రంలో మీనాక్షి చౌద‌రి, ఐశ్వ‌ర్య రాజేశ్‌లు క‌థానాయిక‌లుగా న‌టించగా.. శ్రీ వెంకటేశ్వర క్రియేషన్స్ బ్యానర్‌పై దిల్ రాజు ఈ చిత్రాన్ని నిర్మించారు.
