L Vijayalakshmi : అల్లు అర్జున్ ఇటీవల పుష్ప సినిమాతో దేశవ్యాప్తంగా గుర్తింపు తెచ్చుకున్నాడు. విదేశాల్లోనూ పలు దేశాల్లో మంచి ఫేమ్ తెచ్చుకున్నాడు బన్నీ. తాజాగా ఓ సీనియర్ నటి పుష్ప హీరో ఎవరో తెలియదు అని వ్యాఖ్యలు చేసింది. 1950,60 దశకాలలో తెలుగు, తమిళ్ స్టార్ హీరోస్ అందరితో నటించిన హీరోయిన్ L విజయలక్ష్మి. ఈమె చాలా మంచి డ్యాన్సర్ కూడా. ఒక పదేళ్లు వరుసగా సినిమాలు చేసి ఆ తర్వాత ఓ అగ్రికల్చరల్ సైంటిస్ట్ ని పెళ్లి చేసుకొని సినిమాలు వదిలేసి విదేశాలకి వెళ్ళిపోయింది విజయలక్ష్మి.
మళ్ళీ 50 సంవత్సరాల తర్వాత ఇటీవలే భారతదేశానికి వచ్చారు. ఎన్టీఆర్ శత జయంతి వారోత్సవాల సందర్భంగా ఆమెకి ఎన్టీఆర్ జాతీయ అవార్డుని ప్రకటించడంతో అవార్డు అందుకోవడానికి అమెరికా నుంచి వచ్చారు. 50 ఏళ్ళ తర్వాత ఇండియాకి రావడంతో కొన్ని రోజులు ఇక్కడే ఉంటున్నారు. దీంతో ఆమె పలు ఇంటర్వ్యూలు ఇస్తున్నారు.
తాజాగా విజయలక్ష్మి అలీతో సరదాగా కార్యక్రమానికి వచ్చింది. ఈ ప్రోగ్రాం ప్రోమో రిలీజ్ చేయగా ఇందులో అప్పటి పలు ఆసక్తికర విషయాల గురించి మాట్లాడింది. అయితే విదేశాల్లోనే ఉంటున్నారు కదా, తెలుగు సినిమాలు చూస్తారా? ఇటీవల ఏ తెలుగు సినిమా చూసారు అని అలీ అడిగాడు. దీనికి ఆమె పుష్ప సినిమా చూశాను అని తెలిపింది. దాంట్లో హీరో ఎవరో తెలుసా అని అలీ అడిగితే తెలీదు అని చెప్పింది విజయలక్ష్మి.
దీంతో అలీ.. అతను అల్లు రామలింగయ్య గారి మనవడు అని చెప్పాడు. ఆమె.. అవునా, ఇటీవల ఏ హీరోని చూసి అడిగినా అతను నాగేశ్వర రావు మనవడు, అతను రామానాయుడు మనవడు అనే చెప్తున్నారు అని తెలిపింది విజయలక్ష్మి.
