Nani| నేచురల్ స్టార్ నాని ప్రస్తుతం వరుస హిట్లతో ఫుల్ జోష్‌లో ఉన్నాడు. ‘దసరా’, ‘హాయ్ నాన్న’, ‘సరిపోదా శనివారం’ సినిమాలతో హ్యాట్రిక్ హిట్స్ కొట్టి దూసుకుపోతున్నాడు. ప్రస్తుతం ‘హిట్ 3’ సినిమాతో పాటు ‘దసరా’ డైరెక్టర్‌ శ్రీకాంత్ ఓదెలతో మరో సినిమా చేస్తున్నాడు. వీరిద్దరి కలయికలో వచ్చిన ‘దసరా’ మూవీ నాని కెరీర్‌లోనే అత్యధిక వసూళ్లను రాబట్టింది. తాజాగా వీరి కలయికలో వస్తున్న సినిమాకు ‘ది ప్యారడైజ్’ అనే టైటిల్ కూడా పెట్టారు.
నాని కెరీర్‌లోనే భారీ బడ్జెట్‌తో తెరకెక్కుతున్న ఈ సినిమాలో విలన్ పాత్రలో సీనియర్ హీరో నటిస్తున్నట్లు ఫిల్మ్ నగర్ వర్గాలు చెబుతున్నాయి. విలన్ పాత్రకు సీనియర్ నటులైన కలెక్షన్ కింగ్ మోహన్ బాబు(Mohan Babu), శ్రీకాంత్, శరత్ కుమార్‌లను సంప్రదించినట్లు తెలుస్తోంది. అయితే కథ నచ్చిన మోహన్ బాబు ఇందులో విలన్ పాత్ర చేసేందుకు గ్రీన్ సిగ్నల్ ఇచ్చారట. వచ్చే నెలలో నాని, మోహన్ బాబులపై కీలక సన్నివేశాలు తెరకెక్కించనున్నారని సమాచారం. వీరి కాంబోలో వచ్చే సీన్స్ సినిమాకు హైలైట్‌గా నిలుస్తాయంటున్నారు. కాగా 2008లో ప్రభాస్ హీరోగా నటించిన ‘బుజ్జిగాడు’ మూవీలో మోహన్ బాబు నెగిటివ్ షేడ్స్ ఉన్న పాత్ర చేసిన సంగతి తెలిసిందే.
