ఐకాన్ స్టార్ అల్లు అర్జున్‌(Allu Arjun) హీరోగా నటిస్తోన్న ‘పుష్ప ది రూల్‌’ (Pushpa The Rule) సినిమాలో యంగ్ బ్యూటీ శ్రీలీల ఐటమ్ సాంగ్‌లో ఆడిపాడిన సంగతి తెలిసిందే. ‘కిస్సిక్‌’ (Kissik) అనే ఐటమ్ సాంగ్‌ షూట్‌లో ఇటీవలే పాల్గొన్నారు. ఈ సందర్భంగా బన్నీకి సర్‌ప్రైజ్ నోట్ గిఫ్ట్ పంపించారు. అల్లు అర్జున్‌తో వర్క్ చేయడం తనకెంతో సంతోషాన్ని ఇచ్చిందని పేర్కొన్నారు.
‘‘టు బన్నీ సర్‌.. ప్రేమ, గౌరవంతో ఈ నోట్ మీకు పంపిస్తున్నాను. మీతో వర్క్ చేయడం నాకెంతో అందమైన అనుభూతిని పంచింది. నాకు ఎప్పటికీ గుర్తుండిపోయే అనుభూతిని అందించినందుకు ధన్యవాదాలు. నిజం చెబుతున్నా ఈ ఐదారు రోజులు నాకు ఒక క్రాష్‌ కోర్సులా ఉంది. ఇది కేవలం ఆరంభం మాత్రమే. మీకు, మీ కుటుంబానికి నా ప్రేమాభినందనలు’’ అని ఆమె రాసుకొచ్చారు.
ఇందుకు సంబంధించిన ఫొటోలను అల్లు అర్జున్‌ ఇన్‌స్టా వేదికగా షేర్‌ చేశారు. ‘‘థ్యాంక్యూ మై డియర్‌. మీ మాటలు నా మనసుని తాకాయి.. నువ్వు మరెన్నో విజయాలు అందుకోవాలి. డ్యాన్సింగ్ క్వీన్’’ అని తెలిపారు. కాగా సుకుమార్ దర్శకత్వం వహిస్తున్న ఈ సినిమా డిసెంబర్ 5న ప్రపంచవ్యాప్తంగా విడుదల కానుంది. రేపు(ఆదివారం) సాయంత్రం బీహార్ రాజధాని పట్నాలో ట్రైలర్ లాంఛ్ ఈవెంట్ గ్రాండ్‌గా జరగనుంది. ఇక ఈ సినిమాకు రాక్ స్టార్ దేవిశ్రీ ప్రసాద్ సంగీతం అందించనున్నారు.