ప్రముఖ డ్యాన్స్ ప్రోగ్రామ్ ‘ఢీ'(Dhee) షో తెలుగు రాష్ట్రాలో ఎంతో పాపులర్ అయింది. అనామకులైన వ్యక్తులను టాప్ కొరియోగ్రాఫర్లుగా తీర్చిదిద్దింది. అలాంటి షో అప్పుడప్పుడు వివాదాల్లో చిక్కుకుంటుంది. తాజాగా ఢీ షోకు చెందిన ఓ డ్యాన్సర్ మోసం చేశాడంటూ ఓ యువతి ఆత్మహత్య చేసుకోవడం కలకలం రేపుతోంది. ఖమ్మం రూరల్ మండలం పొన్నెకల్ గ్రామంలో కావ్య కళ్యాణి(24) అనే యువతి ఆత్మహత్య చేసుకుని ప్రాణాలు కోల్పోయింది. ఆమె మరణానికి కారణం ఢీ షో డాన్సర్ అభి అంటూ సెల్ఫీ వీడియోలో తెలిపింది.
“నాకు న్యాయం జరగాలి. నేను చనిపోతున్నాను. నా చావుకి కారణం అభి. 5 ఏళ్లుగా ప్రేమిస్తున్నానని చెప్పి పెళ్లి చేసుకున్నాడు. ఇంటికి తీసుకెళ్లాడు. కానీ ఇప్పుడు నన్ను వదిలేసి మరో అమ్మాయిని పెళ్లి చేసుకుంటున్నాడు” అని వాపోయింది. ఈ విషాదకర ఘటన ఆలస్యంగా వెలుగులోకి వచ్చింది. ప్రస్తుతం ఖమ్మం పోలీసులు నిందితుడు అభిని అదుపులోకి తీసుకుని విచారణ చేస్తున్నారు. ఈ ఘటనకు సంబంధించిన పూర్తి వివరాలు తెలియాల్సి ఉంది.
