అనకాపల్లి జిల్లా కోటవురట్ల మండలం కైలాసపట్నంలోని బాణసంచా తయారీ కేంద్రం(fireworks manufacturing plant)లో ఆదివారం అగ్నిప్రమాదం(Fire Accident) సంభవించింది. ఈ మంటల్లో చిక్కుకొని 8 మంది మృతి చెందారు. మరో ముగ్గురు తీవ్రంగా గాయపడ్డారు. స్థానికులు వెంటనే స్పందించి అగ్నిమాపక సిబ్బందితోపాటు పోలీసులకు సమాచారం అందించారు. అగ్నిమాపక సిబ్బంది ఘటన స్థలానికి చేరుకుని మంటలను అదుపుచేశారు పోలీసులు క్షతగాత్రులను సమీపంలోని ఆసుపత్రికి తరలించారు.
అయితే వారికి మెరుగైన వైద్య చికిత్స కోసం నర్సీపట్నంలోని ఆసుపత్రికి తరలించారు. అయితే వారిలో ముగ్గురి పరిస్థితి ఆందోళనకరంగా ఉందని తెలిపారు. ఇక ఈ అగ్నిప్రమాదం సంభవించిన బాణ సంచా కేంద్రానికి ప్రభుత్వ లైసెన్స్ ఉందని ఉన్నతాధికారులు స్పష్టం చేశారు.
ఈ ప్రమాదంపై పోలీసులు కేసు నమోదు చేసి దర్యాప్తు చేస్తున్నారు. ఆ క్రమంలో ఈ ప్రమాదానికి గల కారణాలను ప్రత్యక్ష సాక్షలను అడిగి పోలీసులు తెలుసుకున్నారు. ఘటన స్థలాన్ని పోలీసు ఉన్నతాధికారులు సందర్శించారు.
ఈ ఘటనపై సీఎం చంద్రబాబు, డిప్యూటీ సీఎం పవన్ కళ్యాణ్, హోం మంత్రి అనిత స్పందించారు. బాధితులకు మెరుగైన వైద్యం అందించాలని తెలిపారు. ఘటనకు సంబంధించిన వివరాలను అడిగి తెలుసుకున్నారు. మృతుల కుటుంబాలకు ప్రభుత్వం అండగా ఉంటుందన్నారు.
