సికింద్రాబాద్ లో ఓ దుండగుడు దారుణానికి తెగబడ్డాడు. నడుచుకుంటూ వెళ్తున్న ఓ వ్యక్తిపై దాడి చేసి.. అతడి నుండి 14 తులాల బంగారు ఆభరణాలను దోచుకెళ్లాడు. ఈ ఘటన సికింద్రాబాద్ లో సోమవారం రాత్రి సమయంలో జరిగింది. హిమాయత్ నగర్‌లోని రాధే జువెల్లర్స్‌కు చెందిన పవన్ బంగారు నగలతో సికింద్రాబాద్ కు బయలుదేరాడు. సికింద్రాబాద్ చేరుకున్నాక ఓ వ్యక్తి అతనివద్ద బంగారు నగలున్నాయని గ్రహించాడు. వాటిపై కన్నేశాడు.
సిటీలైట్ హోటల్ సమీపంలో దుండగుడు అతనిపై దాడి చేశాడు. కళ్లలో కారం చల్లి, కత్తితో పొడిచి.. పవన్ వద్దనున్న 14 తులాల బంగారు నగలను లాక్కొని పరారయ్యాడు. ఘటనపై సమాచారం అందుకున్న పోలీసులు వెంటనే ఆ ప్రాంతానికి చేరుకుని బాధితుడిని గాంధీ ఆస్పత్రికి తరలించారు. బాధితుడి ఫిర్యాదు మేరకు కేసు నమోదు చేసి, దుండగుడి కోసం గాలిస్తున్నారు. దుండగుడి ముఖాన్ని గుర్తించేందుకు సమీపంలోని సీసీటీవీ ఫుటేజీని పరిశీలిస్తున్నారు.