Tragedy in Karnataka: కర్ణాటకలోని బీదర్ జిల్లాలో రాధా సిద్ధాంత్ అనే మహిళ తన ఆరేళ్ల సవతి కూతురు సాన్విని మూడో అంతస్తు నుంచి కిందకు తోసేసి చంపిన కేసులో పోలీసులు ఆమెను సెప్టెంబర్ 15న అరెస్టు చేశారు. ఈ సంఘటన ఆగస్టు 27న జరిగింది. సాన్వి ఇంటికి సమీపంలో ఉన్న ఒక భవనం నుంచి పడిపోయినట్లు మొదట భావించారు. ఆమె తండ్రి సిద్ధాంత్ ఇది ఒక ప్రమాదం అని పోలీసులకు తెలియజేశారు. అయితే, ఈ దారుణమైన ఘటనకు సంబంధించిన సీసీటీవీ ఫుటేజ్ బయటపడటంతో అసలు విషయం వెలుగులోకి వచ్చింది.
సీసీటీవీ ఫుటేజ్‌లో, రాధా సాన్విని భవనం పైకి తీసుకెళ్లడం కనిపించింది. ఆ తరువాత, రాధా ఒంటరిగా కిందకు పరుగెత్తుకు రావడం, ఆ వెంటనే సాన్వి కింద పడిపోవడం రికార్డు అయింది. ఈ ఫుటేజ్ ఆధారంగా పోలీసులు రాధాను ప్రశ్నించగా, ఆమె నేరాన్ని ఒప్పుకుంది. తన భర్త ఆస్తిని తన కన్న పిల్లలకే దక్కేలా చూసేందుకు సాన్విని చంపినట్లు ఆమె అంగీకరించింది. సాన్వి తల్లి 2019లో అనారోగ్యంతో మరణించగా, ఆ తర్వాత సిద్ధాంత్ 2023లో రాధాను వివాహం చేసుకున్నాడు. ఈ కేసులో పోలీసులు విచారణ కొనసాగిస్తున్నారు.
