Drug Racket Exposed in Hyderabad: మేడ్చల్ జిల్లాలో శనివారం సాయంత్రం మహారాష్ట్ర క్రైమ్ బ్రాంచ్ స్పెషల్ పోలీసులు ఆపరేషన్ చేపట్టారు. ముంబాయిలో తీగ లాగితే.. హైదరాబాద్ నగరంలో డ్రగ్స్ డొంక బయటపడింది. మహారాష్ట్ర క్రైమ్ బ్రాంచ్ దాడిలో పెద్దఎత్తున డ్రగ్స్‌ తయారుచేస్తున్నట్లుగా అధికారులు గుర్తించారు. ఈ దాడుల్లో రూ.12 వేల కోట్ల విలువైన డ్రగ్స్‌ లభ్యమైనట్లుగా తెలిపారు. 32 వేల లీటర్ల రా మెటీరియల్‌ స్వాధీనం చేసుకున్నట్లు తెలుస్తోంది. 13 మందిని మహారాష్ట్ర పోలీసులు అరెస్ట్‌ చేశారు.

మహిళ అరెస్ట్ తో గుట్టురట్టు: కెమికల్ ఫ్యాక్టరీ మాటున డ్రగ్స్ దందా చేస్తున్నట్లు పోలీసు అధికారులు తెలిపారు. హైదరాబాద్‌ లో తయారైన డ్రగ్స్.. దేశవ్యాప్తంగా సరఫరా అవుతున్నట్లు పోలీసులు పేర్కొన్నారు. బంగ్లాదేశ్‌కి చెందిన మహిళ అరెస్ట్ తో ఈ డ్రగ్స్ గుట్టు మొత్తం బయటపడిందని అన్నారు. మహారాష్ట్ర పోలీసుల దాడులతో.. తయారీదారులు, సరఫరాదారుల నెట్‌వర్క్‌ మొత్తం గుట్టురట్టయింది. కెమికల్ ఫ్యాక్టరీలో పెద్దఎత్తున ఎండీ డ్రగ్ తయారీని పోలీసులు గుర్తించారు.

ఫ్యాక్టరీపై మెరుపుదాడి: మహారాష్ట్రకు చెందిన మీరా-భయందర్, వసాయి-విరార్ పోలీసులు కొన్నాళ్లుగా ఓ డ్రగ్స్ ముఠాపై హైదరాబాద్ లో నిఘా పెట్టారు. ఈ క్రమంలో తమ గూఢచారులను రంగంలోకి దించి రహస్య ఆపరేషన్ ను నిర్వహించారు. ముఠా మూలాలు చర్లపల్లిలో ఉన్నట్లు పక్కా సమాచారం అందుకుని.. ఫ్యాక్టరీపై మెరుపుదాడి చేశారు. ‘వాఘ్దేవి ల్యాబ్స్’ అనే నకిలీ లైసెన్స్‌తో నడుస్తున్న ఈ ఫ్యాక్టరీలో అత్యాధునిక పరికరాలతో భారీ ఎత్తున డ్రగ్స్ తయారు చేస్తున్నట్లు పోలీసులు గుర్తించారు.