అయ్యప్ప స్వాములు పవిత్రంగా భావించే శబరిమల(Sabarimala) అయ్యప్ప ఆలయం కొన్ని రోజుల పాటు మూతపడనుంది. దేశంలోని సుప్రసిద్ధ పుణ్యక్షేత్రాల్లో ఒకటైన శబరిమల అయ్యప్ప ఆలయంలో మండల దీక్షల సీజన్ ముగిసింది. దీంతో మండల పూజ అనంతరం అధికారులు ఆలయం మూసివేశారు.
ఈ నెల 29 వరకు ఆలయం మూసి ఉంచుతారు. అనంతరం తిరిగి మకర విళక్కు సీజన్ కోసం డిసెంబరు 30న సాయంత్రం 5 గంటలకు ఆలయాన్ని తెరుస్తామని దేవస్థానం వర్గాలు వెల్లడించాయి. జనవరి 14న మకర సంక్రాంతి పర్వదినం సందర్భంగా లక్షలాదిగా అయ్యప్ప భక్తులు శబరిమలకు తరలివచ్చి స్వామి వారిని దర్శించుకుంటారు. అలాగే మకర జ్యోతిని సందర్శించి తన్మత్వం చెందుతారు. ఆ సమయంలో శబరిమల కొండ ప్రాంతం అంతా స్వామియే శరణం అయ్యప్ప నినాదాలతో మార్మోగుతోంది. కాగా ఈ ఏడాది అయ్యప్ప స్వామిని 32,39,756 మంది దర్శించుకున్నారు. గతేడాది 28,42,447 మంది స్వామివారి దర్శనం చేసుకున్నారు.
