Devi Navaratrulu: హిందూ సంప్రదాయంలో అత్యంత పవిత్రమైన పండుగలలో నవరాత్రులు ఒకటి. ఈ తొమ్మిది రోజుల పాటు దుర్గా, లక్ష్మి, సరస్వతి రూపాల్లో దుర్గాదేవిని పూజించడం వల్ల సకల సౌభాగ్యాలు కలుగుతాయని భక్తుల విశ్వాసం. అయితే ఈ పూజలు సంపూర్ణంగా ఫలించాలంటే నవరాత్రులు ప్రారంభమయ్యే ముందు కొన్ని ప్రత్యేక నియమాలను పాటించడం తప్పనిసరి. ఈ నియమాలు ఆధ్యాత్మిక చింతన, పవిత్రతకు ప్రతీకలుగా నిలుస్తాయి. అయితే ఆ నియమాలేంటో తెలుసుకుందాం.
పవిత్రతకు ప్రాధాన్యత: నవరాత్రులు ఆరంభానికి ముందు మనం మన శరీరాన్ని దుర్గాదేవి పూజా విధానానికి అనుగుణంగా మార్చుకోవాలి. మనస్సును ఆధ్యాత్మికత వైపు మరల్చాలి. మన పరిసరాలను పూజకు అనుకూలంగా మార్చుకోవాలి. ఇందుకు పాటించాల్సిన ముఖ్యమైన నియమాలు కింద ఇవ్వబడ్డాయి
ఇంటి శుద్ధి: నవరాత్రులకు ముందు ఇంటిని పూర్తిగా శుభ్రం చేసుకోవాలి. చెత్తతో పాటుగా పనికిరాని వస్తువులను తొలగించడం వల్ల ఇంట్లో ఉన్న ప్రతికూల శక్తి తొలగిపోతుంది. సానుకూల శక్తి ప్రవహిస్తుంది. ముఖ్యంగా పూజా మందిరాన్ని శుభ్రం చేసి, ముగ్గులు వేసి అలంకరించాలి.
వ్యక్తిగత శుద్ధి: నవరాత్రులు ప్రారంభమయ్యే రోజు తలస్నానం చేసి శుభ్రమైన దుస్తులు ధరించాలి. ఉపవాస దీక్షలు చేపట్టేవారు తమ శరీరాన్ని అందుకు సిద్ధం చేసుకోవాలి. ఉపవాసం మనస్సుతో పాటుగా శరీరాన్ని శుద్ధి చేస్తుంది.
సాత్విక ఆహారం: ఈ తొమ్మిది రోజులు సాత్విక ఆహారం తీసుకోవడం ఉత్తమం. మాంసాహారం, ఉల్లి, వెల్లుల్లి, మరియు ఆల్కహాల్ వంటివి పూర్తిగా మానేయాలి. సాత్విక ఆహారం మనస్సును ప్రశాంతంగా ఉంచడంతో పాటుగా పూజకు తోడ్పడుతుంది.
మానసిక ప్రశాంతత: నవరాత్రులకు ముందు మనస్సును ప్రశాంతంగా ఉంచుకోవడం చాలా ముఖ్యం. అనవసరమైన గొడవలు, చెడు ఆలోచనలకు దూరంగా ఉండాలి. ధ్యానం, కీర్తనల ద్వారా మన మనస్సును దైవానికి అంకితం చేయాలి.
Also Read:https://teluguprabha.net/telangana-news/telangana-begins-bathukamma-flower-festival/
ఈ నియమాలను పాటించడం ద్వారా నవరాత్రులకు సరైన వాతావరణం ఏర్పడుతుంది. ఇవి కేవలం ఆచారాలు మాత్రమే కాకుండా మనల్ని మనం శుద్ధి చేసుకుని.. దైవిక శక్తిని ఆహ్వానించడానికి ఉపయోగపడతాయి. ఈ విధంగా నవరాత్రులను ప్రారంభించడం వల్ల అమ్మవారి ఆశీస్సులు లభించి జీవితం సుఖసంతోషాలతో నిండి ఉంటుందని భక్తులు విశ్వసిస్తారు.
