Causes of morning hypertension : ఉదయం నిద్ర లేవగానే ఉత్సాహానికి బదులుగా, తలనొప్పి, నీరసంతో రోజు మొదలవుతోందా? అయితే, మీ రక్తపోటు (BP) స్థాయిలను ఓసారి చెక్ చేసుకోవాల్సిన సమయం వచ్చిందేమో! ఉదయం పూట బీపీ సాధారణం కంటే ఎక్కువగా ఉండటాన్ని ‘మార్నింగ్ హైపర్‌టెన్షన్’ అంటారు. ఇది గుండెపోటు, స్ట్రోక్ వంటి ప్రాణాంతక సమస్యలకు ముందస్తు హెచ్చరిక కావచ్చని వైద్య నిపుణులు హెచ్చరిస్తున్నారు. 

ఏమిటీ ‘మార్నింగ్ హైపర్‌టెన్షన్’ : సాధారణంగా, రాత్రి నిద్రలో మన రక్తపోటు తగ్గుతుంది. ఉదయం నిద్ర లేచే ముందు, శరీరం రోజువారీ కార్యకలాపాలకు సిద్ధమవడానికి కార్టిసాల్, అడ్రినాలిన్ వంటి హార్మోన్లను విడుదల చేస్తుంది. దీనివల్ల బీపీ కొద్దిగా పెరుగుతుంది. ఇది సహజం. కానీ, కొందరిలో ఈ పెరుగుదల ప్రమాదకర స్థాయిలో ఉంటుంది. దీనినే ‘మార్నింగ్ హైపర్‌టెన్షన్’ అంటారు.

ప్రధాన కారణాలు.. మన జీవనశైలిలోనే : ఈ సమస్యకు మన జీవనశైలి, ఆరోగ్య సమస్యలే ప్రధాన కారణాలని స్లీప్ ఫౌండేషన్ (Sleep Foundation), నేషనల్ లైబ్రరీ ఆఫ్ మెడిసిన్ (National Library of Medicine) వంటి సంస్థల అధ్యయనాలు స్పష్టం చేస్తున్నాయి.

స్లీప్ అప్నియా (నిద్రలో శ్వాసకు ఆటంకం): ఇది ప్రధాన కారణాలలో ఒకటి. నిద్రలో శ్వాస పదేపదే ఆగిపోవడం వల్ల, ఆక్సిజన్ స్థాయిలు తగ్గి, ఒత్తిడి హార్మోన్లు విడుదలై, ఉదయం బీపీ అమాంతం పెరుగుతుంది.

మందుల ప్రభావం తగ్గడం: బీపీ కోసం వాడే మందులు స్వల్పకాలికంగా పనిచేసేవి అయితే, ఉదయానికి వాటి ప్రభావం తగ్గిపోయి, రక్తపోటు పెరిగే అవకాశం ఉంది. మందులు సరైన సమయంలో తీసుకోకపోవడం కూడా ఓ కారణమే.

తప్పుడు ఆహారపు అలవాట్లు: పడుకునే ముందు ఉప్పు ఎక్కువగా ఉన్న, ప్రాసెస్ చేసిన ఆహారం తినడం వల్ల, శరీరంలో నీరు చేరి, రక్తపోటు పెరుగుతుంది.

మద్యం సేవించడం: రాత్రిపూట మద్యం తాగితే మంచి నిద్ర పడుతుందనుకోవడం అపోహే. ఇది నిద్రకు ఆటంకం కలిగించడమే కాకుండా, ఉదయం బీపీని పెంచుతుంది.

ఒత్తిడి, ఆందోళన: తీవ్రమైన ఒత్తిడి, ఆందోళన ఉన్నవారిలో, ఉదయం హార్మోన్ల పెరుగుదల (Morning Surge) ఎక్కువగా ఉండి, బీపీ వేగంగా పెరుగుతుంది.

ఇతర ఆరోగ్య సమస్యలు: కిడ్నీ సమస్యలు, డయాబెటిస్, ఊబకాయం వంటివి కూడా ఉదయం పూట అధిక రక్తపోటుకు దారితీస్తాయి.

నివారణ ఎలా : జీవనశైలిలో చిన్న చిన్న మార్పులు చేసుకోవడం ద్వారా ఈ సమస్యను అదుపులో ఉంచుకోవచ్చు. స్లీప్ అప్నియా వంటి సమస్యలుంటే, వెంటనే వైద్యుడిని సంప్రదించి చికిత్స తీసుకోవాలి. రాత్రిపూట తేలికపాటి, ఉప్పు తక్కువగా ఉన్న ఆహారం తీసుకోవాలి. మద్యపానానికి దూరంగా ఉండాలి.

క్రమం తప్పకుండా వ్యాయామం, ధ్యానం చేయడం ద్వారా ఒత్తిడిని తగ్గించుకోవాలి.
వైద్యుడి సలహా మేరకు, దీర్ఘకాలికంగా పనిచేసే బీపీ మందులకు మారడం లేదా వాటిని తీసుకునే సమయాన్ని మార్చుకోవడం మంచిది. ఉదయం పూట రక్తపోటు తరచుగా ఎక్కువగా ఉంటుంటే, ఏమాత్రం నిర్లక్ష్యం చేయకుండా వైద్యుడిని సంప్రదించడం మీ గుండె ఆరోగ్యానికి శ్రేయస్కరం.