Russia vs Ukraine: ఉక్రెయిన్‌, రష్యా మధ్య భీకరమైన యుద్ధం కొనసాగుతున్న విషయం తెలిసిందే. ఈ యుద్ధం ముగిసిపోవాలని అంతా భావిస్తున్న నేపథ్యంలో రష్యాకు ఉత్తరకొరియా మద్దతు మరింత ఆందోళనకరంగా మారింది. తాజాగా ఉక్రెయిన్‌ మిలిటరీ ఇంటెలిజెన్స్ చీఫ్ కైరులో బుడనోవ్ చేసిన వ్యాఖ్యలు దీనికి ఆధారంగా నిలుస్తున్నాయి. ఆయన పేర్కొన్న ప్రకారం, ప్రస్తుతం రష్యా ఉపయోగిస్తున్న ఆయుధాల్లో సుమారు 40 శాతం ఉత్తరకొరియా నుంచే వస్తున్నట్లు వెల్లడించారు.
బుడనోవ్ తెలిపిన వివరాల ప్రకారం, గత ఏడాది రష్యా అధ్యక్షుడు వ్లాదిమిర్ పుతిన్, ఉత్తరకొరియా నేత కిమ్ జోంగ్ ఉన్‌ల మధ్య సైనిక ఒప్పందం జరిగిన నేపథ్యంలో ఈ పరిణామాలు చోటుచేసుకున్నాయి. ఈ ఒప్పందం ప్రకారం, ఉత్తరకొరియా తన వద్ద ఉన్న బాలిస్టిక్ క్షిపణులు, భారీ తుపాకీ వ్యవస్థలను మాస్కోకు పంపిస్తున్నట్లు సమాచారం. దీనికి ప్రత్యామ్నాయంగా రష్యా ఉత్తరకొరియాకు భారీ మొత్తంలో నగదు, టెక్నాలజీ అందజేస్తున్నట్లు బుడనోవ్ తెలిపారు. యుద్ధానికి సంబంధించి కాల్పుల విరమణ ఒప్పందం త్వరితగతిన జరగాలని ఆయన ఆశాభావం వ్యక్తం చేశారు.
ఇందుకోసం అమెరికా మాజీ అధ్యక్షుడు డొనాల్డ్ ట్రంప్ కూడా పలు మార్లు జోక్యం చేసేందుకు ప్రయత్నించారు. పుతిన్‌తో ఫోన్ సంభాషణలు జరిపినప్పటికీ, శాంతి చర్చలు ఆశించిన స్థాయికి చేరలేదని ట్రంప్ అసంతృప్తి వ్యక్తం చేశారు. మరోవైపు అమెరికా ఆయుధ నిల్వలు తగ్గిపోతున్నాయన్న ఆందోళనల మధ్య గతంలో ఉక్రెయిన్‌కు ఇచ్చే సహాయాన్ని తాత్కాలికంగా ఆపిన ట్రంప్, తర్వాత తన నిర్ణయాన్ని మారుస్తూ మళ్లీ ఆయుధాల పంపిణీకి గ్రీన్ సిగ్నల్ ఇచ్చారు. పుతిన్ ప్రజల ప్రాణాలతో ఆటలాడుతున్నారని ఆరోపిస్తూ, కీవ్‌కు అవసరమైన మద్దతు అందించాలనే ఉద్దేశంతో ఆయుధాల సరఫరా పునఃప్రారంభించాలని నిర్ణయించినట్టు తెలిపారు.
ఇక గతంలో కిమ్ జోంగ్ ఉన్ రష్యాకు బేషరతుగా మద్దతిస్తున్నట్టు అధికారికంగా ప్రకటించారు. రెండు దేశాల మధ్య బలమైన మిలిటరీ సంబంధాలు ఏర్పడటంతో, ఉత్తరకొరియా సుమారు 30 వేల సైనికులను మాస్కోకు మద్దతుగా పంపేందుకు సిద్ధంగా ఉందన్న వార్తలు ఇటీవల చర్చనీయాంశంగా మారాయి. ఇప్పటికే 2023 నవంబర్‌లో ఉక్రెయిన్‌ దళాలు కుర్క్‌స్‌ ప్రాంతంలోకి చొరబడ్డ సమయంలో, ఉత్తరకొరియా 11,000 మందికి పైగా సైనికులను రష్యా తరపున పంపినట్లు చెబుతున్నారు. ఈ పరిణామాల నేపథ్యంలో యుద్ధానికి అంతు పలికించే మార్గం కోసం అంతర్జాతీయ సమాజం ఎదురుచూస్తున్నప్పటికీ, మద్దతుల మార్పిడులు, ఆయుధాల సరఫరా ఈ సంఘర్షణను మరింత తీవ్రమవుతున్న సూచనలుగా కనిపిస్తున్నాయి.
