Modi Macron discuss Ukraine peace efforts : ప్రపంచ రాజకీయాలు ఉక్రెయిన్ సంక్షోభం చుట్టూ తిరుగుతున్న వేళ, భారత ప్రధాని నరేంద్ర మోదీ దౌత్యపరమైన చతురత మరోసారి తెరపైకి వచ్చింది. ఫ్రాన్స్‌ అధ్యక్షుడు ఇమ్మాన్యుయేల్‌ మెక్రాన్‌తో ప్రధాని మోదీ ఫోన్‌లో కీలక మంతనాలు జరిపారు. ఇరు దేశాల ద్వైపాక్షిక సంబంధాల సమీక్షతో పాటు, ప్రధానంగా ఉక్రెయిన్‌లో శాంతిని నెలకొల్పేందుకు జరుగుతున్న ప్రయత్నాలపైనే వీరిద్దరి చర్చ సాగింది. ఒకవైపు రష్యా, మరోవైపు పశ్చిమ దేశాలతో సత్సంబంధాలు నెరుపుతున్న భారత్, ఈ సంక్షోభంలో శాంతి దూతగా మారుతోందా..? 

శాంతి చర్చలకే భారత్ మద్దతు : ఫ్రాన్స్ అధ్యక్షుడు మెక్రాన్‌తో జరిగిన ఫోన్ సంభాషణలో, ఉక్రెయిన్ వివాదాన్ని ముగించేందుకు జరుగుతున్న అంతర్జాతీయ ప్రయత్నాలపై ఇరువురు నేతలు కూలంకషంగా చర్చించారు. చర్చలు, దౌత్య మార్గాల ద్వారానే ఈ సమస్యకు శాశ్వత పరిష్కారం లభిస్తుందని భారత్ బలంగా విశ్వసిస్తోందని ప్రధాని మోదీ మరోమారు పునరుద్ఘాటించారు. “అధ్యక్షుడు మెక్రాన్‌తో చాలా మంచి సంభాషణ జరిగింది. ఉక్రెయిన్ వివాదాన్ని త్వరగా ముగించే ప్రయత్నాలతో పాటు, పలు అంతర్జాతీయ అంశాలపై అభిప్రాయాలు పంచుకున్నాం. ప్రపంచ శాంతి, స్థిరత్వాన్ని పెంపొందించడంలో భారత్-ఫ్రాన్స్ వ్యూహాత్మక భాగస్వామ్యం కీలక పాత్ర పోషిస్తుంది,” అని ప్రధాని మోదీ సోషల్ మీడియాలో పేర్కొన్నారు.

భారత్ చొరవ.. అంతర్జాతీయ అంగీకారం : ఇటీవల కాలంలో ఉక్రెయిన్ శాంతి చర్చల విషయంలో భారత్ క్రియాశీలక పాత్ర పోషిస్తోంది. ఈ వారం చైనాలో జరిగిన షాంఘై సహకార సంస్థ (SCO) సదస్సులో రష్యా అధ్యక్షుడు పుతిన్‌తో భేటీ అయిన మోదీ, ఇది యుద్ధాల యుగం కాదని స్పష్టం చేశారు. ఆ తర్వాత ఉక్రెయిన్ అధ్యక్షుడు జెలెన్​స్కీతోనూ ఫోన్‌లో మాట్లాడారు. రష్యాపై ఒత్తిడి తెచ్చి, శాంతి మార్గం వైపు నడిపించేందుకు భారత్ అవసరమైన ప్రయత్నాలు చేయాలని జెలెన్​స్కీ కోరారు. ఈ పరిణామాల నేపథ్యంలో, అమెరికా అధ్యక్షుడు ట్రంప్, జెలెన్​స్కీలతో వైట్ హౌస్‌లో జరిగిన చర్చల్లో పాల్గొన్న మెక్రాన్, ఇప్పుడు మోదీతో మాట్లాడటం ప్రాధాన్యం సంతరించుకుంది.

ద్వైపాక్షిక బంధం.. మరింత పటిష్ఠం : ఉక్రెయిన్ అంశంతో పాటు, ఇరు నేతలు రక్షణ, ఆర్థిక, అంతరిక్షం, సైన్స్ అండ్ టెక్నాలజీ వంటి రంగాల్లో ద్వైపాక్షిక సహకారాన్ని సమీక్షించుకున్నారు. భారత్‌లో వచ్చే ఏడాది ఫిబ్రవరిలో జరగనున్న ‘ఏఐ ఇంపాక్ట్ సమ్మిట్’కు రావాల్సిందిగా  ఆహ్వానాన్ని మెక్రాన్ అంగీకరించడం పట్ల మోదీ హర్షం వ్యక్తం చేశారు. ఆయనకు స్వాగతం పలికేందుకు ఎదురుచూస్తున్నట్లు తెలిపారు. ప్రపంచ శాంతి, స్థిరత్వాన్ని కాపాడేందుకు కలిసి పనిచేయాలని ఇరువురు నేతలు అంగీకారానికి వచ్చారు.

మొత్తంమీద, రష్యా-ఉక్రెయిన్ వివాదంలో సంప్రదింపులకు సిద్ధంగా ఉన్న కొద్ది దేశాలలో ఒకటిగా భారత్ తన స్థానాన్ని సుస్థిరం చేసుకుంటోంది. మోదీ-మెక్రాన్ ఫోన్ కాల్ ఈ దిశగా పడిన మరో కీలక అడుగుగా అంతర్జాతీయ విశ్లేషకులు భావిస్తున్నారు.