US Strikes on Iran Threaten Global Peace: ఇజ్రాయెల్, ఇరాన్ మధ్య కొనసాగుతున్న ఉద్రిక్తతల నేపథ్యంలో అమెరికా ప్రత్యక్షంగా రంగంలోకి దిగి ఇరాన్‌లోని ఫోర్డో (Fordo), నతాంజ్ (Natanz), ఇస్ఫాహాన్ (Isfahan) అణు కేంద్రాలపై దాడి చేయడాన్ని ఐక్యరాజ్యసమితి ప్రధాన కార్యదర్శి అంటోనియో గుటెరెస్ (António Guterres) తీవ్రంగా ఖండించారు. ఈ ప్రాంతంలో ఇప్పటికే ఉద్రిక్తతలు నెలకొన్న పరిస్థితుల్లో, వీటిని మరింత ప్రమాదకరంగా మార్చే చర్యలను తక్షణమే ఆపాలి అని గుటెరెస్ అన్నారు. శాంతి, స్థిరత్వం కోసం అంతర్జాతీయ సమాజం ఏకతాటిపై నిలవాల్సిన అవసరం ఉందని ఆయన విజ్ఞప్తి చేశారు.
ఇరాన్-ఇజ్రాయెల్ యుద్ధంలో అమెరికా ప్రవేశం: ఐరాస శాంతి స్థాపనకు పిలుపు : ఇరాన్-ఇజ్రాయెల్ మధ్య కొనసాగుతున్న ఘర్షణల్లో అమెరికా నేరుగా రంగంలోకి దిగింది. ఇరాన్‌కు చెందిన మూడు కీలక అణు కేంద్రాలపై దాడి చేసింది. ఈ దాడిని ఇరాన్ కూడా అధికారికంగా ధ్రువీకరించడంతో, ఈ పరిణామం తీవ్ర యుద్ధానికి దారితీసే అవకాశం కనిపిస్తోంది.
ఈ నేపథ్యంలో, మధ్యప్రాచ్యంలో నెలకొన్న ఉద్రిక్తతలను తగ్గించడానికి ఐక్యరాజ్యసమితి (ఐరాస) సభ్య దేశాలు కృషి చేయాలని ఆంటోనియో గుటెరెస్ పిలుపునిచ్చారు. ఐరాస సభ్య దేశాలు తప్పనిసరిగా ఐరాస ఛార్టర్ నియమాలను పాటించాలని ఆయన సూచించారు. సైనిక చర్యలతో ఉద్రిక్తతలను నివారించలేమని, కేవలం దౌత్యపరమైన పరిష్కారాలతోనే శాంతి నెలకొంటుందని గుటెరెస్ స్పష్టం చేశారు.
ట్రంప్ నిర్ణయం చరిత్రను మారుస్తుంది :
ఇరాన్‌లోని అణు స్థావరాలపై దాడికి సహకరించిన అమెరికా అధ్యక్షుడు డొనాల్డ్ ట్రంప్‌నకు ఇజ్రాయెల్ ప్రధాని బెంజమిన్ నెతన్యాహు కృతజ్ఞతలు తెలిపారు. ట్రంప్ తీసుకున్న ఈ సాహసోపేతమైన నిర్ణయం చరిత్రనే మారుస్తుందని ఆయన వ్యాఖ్యానించారు.
నెతన్యాహు మాట్లాడుతూ, “అమెరికా అధ్యక్షుడు డొనాల్డ్ ట్రంప్‌నకు నా అభినందనలు. మీ అద్భుతమైన, ధర్మబద్ధమైన శక్తితో ఇరాన్ అణుకేంద్రాలపై దాడులు చేశారు. మీ నిర్ణయం సాహసోపేతమైనది. ఇది చరిత్రనే మార్చేస్తుంది. ఈ భూమిపై మరే దేశం చేయలేనిది మీరు చేశారు” అని ప్రశంసించారు.
యుద్ధంతోనే శాంతి: ఇరాన్ అణు స్థావరాలపై జరిగిన దాడి నేపథ్యంలో ఇజ్రాయెల్ ప్రధాని బెంజమిన్ నెతన్యాహు కీలక వ్యాఖ్యలు చేశారు. “ప్రపంచంలోని అత్యంత ప్రమాదకరమైన ఇరాన్ పాలనను, దాని వద్ద ఉన్న ఆయుధాలను అంతం చేసేందుకు డొనాల్డ్ ట్రంప్ తీసుకున్న చర్యలు చరిత్రలో నిలిచిపోతాయి. ట్రంప్, తాను తరచుగా యుద్ధం ద్వారానే శాంతి వస్తుంది అని నమ్ముతున్నట్లు తెలిపారు.
ఇరాన్ అణు కేంద్రాలపై దాడులు : అమెరికా ఇరాన్‌లోని ఫోర్డో, నతాంజ్, ఇస్ఫాహాన్ అనే మూడు అణు కేంద్రాలపై పెద్ద ఎత్తున దాడులు చేసింది. ఇరాన్ అధికారిక మీడియా కూడా ఈ దాడులు నిజమేనని చెప్పింది. ఈ నేపథ్యంలోనే, ఇజ్రాయెల్ ప్రధాని బెంజమిన్ నెతన్యాహు మాట్లాడుతూ, “యుద్ధం మొదలైనప్పుడే ఇరాన్ అణు కేంద్రాలను నాశనం చేస్తానని నేను మాట ఇచ్చాను. ఇప్పుడు ఆ మాట నిలబెట్టుకున్నాను” అని స్పష్టం చేశారు.