72-Year-Old Woman Donates Kidney To Save Son’s Life: మధ్యప్రదేశ్ రాష్ట్రంలోని ఇండోర్‌లో మాతృత్వం విలువను మరోసారి చాటి చెప్పే అరుదైన ఘటన చోటు చేసుకుంది. 72 ఏళ్ల వృద్ధురాలు అనారోగ్యంతో బాధపడుతున్న తన కుమారుడికి కిడ్నీ దానం చేసి, అతనికి పునర్జన్మ ప్రసాదించారు.
అధికారుల సమాచారం ప్రకారం, స్థానిక నివాసి కమలేష్ వర్మ (46) గత మూడేళ్లుగా తీవ్రమైన కిడ్నీ సమస్యతో బాధపడుతున్నాడు. మూడు సంవత్సరాలుగా డయాలసిస్ చేయించుకుంటున్నప్పటికీ, అతని ఆరోగ్య పరిస్థితిలో ఏ మాత్రం మెరుగుదల కనిపించలేదు. దీంతో వైద్యులు అతనికి కిడ్నీ మార్పిడి (Kidney Transplant) చేయాలని సిఫార్సు చేశారు.
సవాలుగా మారిన శస్త్రచికిత్స.. తల్లి సాహసం
కుమారుడిని కాపాడుకోవడానికి ఎవరైనా కిడ్నీ దానం చేయవలసిన పరిస్థితి రావడంతో, కమలేష్ తల్లి గంగా వర్మ (72) ధైర్యంగా ముందుకు వచ్చారు. ఆమె కిడ్నీ దానం చేయడానికి సిద్ధపడటంతో, నగరంలోని ప్రభుత్వ సూపర్ స్పెషాలిటీ హాస్పిటల్‌లో కొద్ది రోజుల క్రితం కిడ్నీ మార్పిడి శస్త్రచికిత్సను విజయవంతంగా నిర్వహించారు.
ఈ అరుదైన శస్త్రచికిత్స గురించి ఆసుపత్రిలోని నెఫ్రాలజీ విభాగం అధిపతి డాక్టర్ రితేష్ బనోడే మాట్లాడుతూ, “దాత వయస్సు 72 సంవత్సరాలు కావడం వల్ల ఈ కిడ్నీ మార్పిడి శస్త్రచికిత్స సవాలుగా మారింది. అయినప్పటికీ, ఆపరేషన్ పూర్తిగా విజయవంతమైంది” అని తెలిపారు. ఈ ఘటన అవయవ దానం పట్ల ప్రజలను ప్రేరేపిస్తుందని తాను ఆశిస్తున్నానని డాక్టర్ బనోడే పేర్కొన్నారు.
‘కొడుకు ప్రాణం కాపాడటం తల్లి విధి’
ప్రస్తుతం ఆసుపత్రి నుంచి డిశ్చార్జ్ అయిన తల్లి, కొడుకు ఇద్దరూ ఇంట్లోనే కోలుకుంటున్నారు.
ALSO READ: A Week Early Diwali: వారం ముందే దీపావళి.. ఈ వింత గ్రామంలో దీపాల పండుగ వెనుక ఓ ఆసక్తికర కథ!
తల్లి గంగా వర్మ ఈ సందర్భంగా మాట్లాడుతూ, “తన బిడ్డ ప్రాణాన్ని కాపాడటం ఒక తల్లి విధి. నా కిడ్నీ నా కొడుకు ప్రాణాన్ని నిలబెట్టిందంటే, అంతకంటే సంతోషం నాకు ఇంకేముంటుంది?” అని పుత్రప్రేమను చాటారు.
లాండ్రీమన్ వృత్తి చేసుకునే కమలేష్ వర్మ ఉద్వేగానికి లోనై, “నేను గత మూడేళ్లుగా డయాలసిస్ చేయించుకుంటున్నాను. ఇప్పుడు మా అమ్మ నాకు మళ్లీ ప్రాణం పోసింది. ఈ ఋణాన్ని నేను ఎన్నటికీ తీర్చుకోలేను” అని కన్నీటి పర్యంతమయ్యారు. మాతృత్వపు గొప్పదనాన్ని నిరూపించిన ఈ సంఘటన ఇండోర్‌లో చర్చనీయాంశమైంది.
