Astra AI for social media monitoring : సోషల్ మీడియా.. ఓ వైపు జ్ఞాన భాండాగారం, మరోవైపు విద్వేష ప్రచారానికి అస్త్రం. పొరుగు దేశం నేపాల్‌లో యువత తిరుగుబాటుకు సోషల్ మీడియానే ఆజ్యం పోసింది. ఇలాంటి తరుణంలో, మన దేశంలో విద్రోహ శక్తులు సామాజిక మాధ్యమాల ద్వారా చిచ్చు పెట్టకుండా అడ్డుకట్ట వేసేందుకు, నలుగురు ఇంజినీరింగ్ విద్యార్థులు ఓ అద్భుతమైన ‘అస్త్రా’న్ని సిద్ధం చేశారు. అదే ‘అస్త్రా ఏఐ’. దేశ వ్యతిరేక పోస్టులను క్షణాల్లో గుర్తించి, అధికారులను అప్రమత్తం చేసి, వాటిని తొలగించే ఈ కృత్రిమ మేధ (AI) ఆధారిత ఆవిష్కరణపై ప్రత్యేక కథనం.
యువ మేధస్సు.. అద్భుత ఆవిష్కరణ : మధ్యప్రదేశ్‌లోని జబల్‌పూర్‌కు చెందిన ప్రైవేట్ ఇంజినీరింగ్ కళాశాల విద్యార్థులు శివన్ బస్సీ, సాన్య అగర్వాల్, ప్రియాంశి, హర్ష్ కుమార్, నిశాంత్ దూబేలు ఈ ‘అస్త్రా ఏఐ’ సాఫ్ట్‌వేర్‌ను రూపొందించారు. ఇటీవలే జరిగిన ‘నేషనల్ సైబర్ షీల్డ్ హ్యాకథాన్‌’లో పోలీసు ఉన్నతాధికారుల సమక్షంలో దీని పనితీరును ప్రదర్శించి, అందరి మన్ననలూ పొందారు.
‘అస్త్రా ఏఐ’ ఎలా పనిచేస్తుంది : ఈ సాఫ్ట్‌వేర్ ఫేస్‌బుక్, ట్విట్టర్ (ఎక్స్), ఇన్‌స్టాగ్రామ్ వంటి అన్ని ప్రధాన సామాజిక మాధ్యమాలను నిరంతరం పర్యవేక్షిస్తుంది.
గుర్తింపు: ఎవరైనా దేశ వ్యతిరేక కంటెంట్ (టెక్స్ట్, ఫోటో, వీడియో, రీల్) పోస్ట్ చేయగానే, ‘అస్త్రా ఏఐ’ దానిని పదజాలం, చిత్రాల ఆధారంగా వెంటనే గుర్తిస్తుంది.
వర్గీకరణ: ఆ పోస్ట్ తీవ్రతను బట్టి, ‘తక్కువ’, ‘క్లిష్టమైన’, ‘అధిక తీవ్రత’ గలదిగా మూడు కేటగిరీలుగా వర్గీకరిస్తుంది.
ప్రొఫైల్ క్రియేషన్: పోస్ట్ చేసిన వ్యక్తి లేదా సంస్థకు సంబంధించిన పూర్తి వివరాలతో ఒక ప్రత్యేక ప్రొఫైల్‌ను తక్షణమే సృష్టిస్తుంది.
అప్రమత్తత: ఈ పూర్తి సమాచారాన్ని పోలీసు సైబర్ సెల్, జాతీయ భద్రతా, నిఘా సంస్థలకు రియల్ టైంలో పంపుతుంది.
తొలగింపు: అధికారులను అప్రమత్తం చేయడంతో పాటు, ఆ హానికరమైన పోస్ట్‌ను సామాజిక మాధ్యమాల నుంచి క్షణాల్లో తొలగిస్తుంది.
“టెక్ట్స్ స్క్రిప్ట్‌, ఇన్‌స్టాగ్రామ్ రీల్, యూట్యూబ్ వీడియో ఏ రూపంలో ఉన్నా గుర్తించడం అస్త్రా ఏఐ ప్రత్యేకత. ఈ పోస్ట్ చేసిన వ్యక్తి ప్రొఫైల్‌ను సైతం మా యాప్ క్రియేట్ చేస్తుంది. తద్వారా అతడిని పోలీసులు సులభంగా పట్టుకోగలరు.”
– సాన్య అగర్వాల్, ‘అస్త్రా ఏఐ’ బృంద సభ్యురాలు
సాంకేతిక ఆధిక్యత ఈ సాఫ్ట్‌వేర్‌కు అనేక ప్రత్యేకతలున్నాయి..
ఆటోమేటిక్ అప్‌డేట్: ఇది తనను తాను ఆటోమేటిక్‌గా అప్‌డేట్ చేసుకుంటూ, విద్రోహ శక్తుల కొత్త పద్ధతులకు అనుగుణంగా తన సాంకేతిక స్వరూపాన్ని మార్చుకోగలదు.
బాట్‌ల గుర్తింపు: తప్పుడు సమాచారాన్ని వేగంగా వ్యాప్తి చేసే ‘ఇంటర్నెట్ బాట్‌’లను సైతం ఇది గుర్తించి, వాటిని నిరోధించగలదు.
మానవ ప్రమేయం లేకుండా: ప్రతి సెకనుకు అప్‌లోడ్ అయ్యే లక్షలాది పోస్టులను మనుషులు పర్యవేక్షించడం అసాధ్యం. ఈ పనిని ‘అస్త్రా ఏఐ’ మానవ ప్రమేయం లేకుండా, అత్యంత కచ్చితత్వంతో చేస్తుంది. శ్రీలంక, బంగ్లాదేశ్, నేపాల్ వంటి దేశాల్లో తప్పుడు సోషల్ మీడియా పోస్టులే ప్రజా తిరుగుబాట్లకు, హింసకు దారితీశాయి. అలాంటి పరిస్థితులు మన దేశంలో తలెత్తకుండా, సామాజిక సామరస్యాన్ని కాపాడటంలో ‘అస్త్రా ఏఐ’ వంటి ఆవిష్కరణలు కీలక పాత్ర పోషించనున్నాయి.
