Tejashwi Yadav election promises : బిహార్ ఎన్నికల వేడి రాజుకుంటోంది. ప్రధాన పార్టీల మధ్య మాటల తూటాలు పేలుతున్న వేళ, ‘మహాగఠ్‌బంధన్’ ముఖ్యమంత్రి అభ్యర్థి, ఆర్జేడీ నేత తేజస్వీ యాదవ్ హామీల వర్షం కురిపించారు. పంచాయతీ ప్రతినిధుల నుంచి చేతివృత్తుల వారి వరకు, అన్ని వర్గాలను ఆకట్టుకునేలా కీలక ప్రకటనలు చేశారు. కేవలం హామీలేనా, లేక అధికారం చేజిక్కించుకోవడానికి పక్కా వ్యూహమా? ఇంతకీ తేజస్వీ ఇచ్చిన ఆ వరాలేంటి?

పంచాయతీ రాజ్ ప్రతినిధులకు పెద్దపీట : పట్నాలో ఏర్పాటు చేసిన మీడియా సమావేశంలో తేజస్వీ యాదవ్ మాట్లాడుతూ, తమ ‘ఇండియా’ కూటమి అధికారంలోకి వస్తే పంచాయతీ రాజ్ వ్యవస్థ ప్రతినిధుల భత్యాలను రెట్టింపు చేస్తామని ప్రకటించారు. అంతేకాకుండా, వారికి రూ. 50 లక్షల బీమా సౌకర్యంతో పాటు పెన్షన్ కూడా అందిస్తామని హామీ ఇచ్చారు. గ్రామీణ పాలనకు వెన్నెముకగా నిలిచే ఈ వర్గాన్ని ఆకట్టుకునేందుకు ఈ కీలక ప్రకటన చేసినట్లు రాజకీయ విశ్లేషకులు భావిస్తున్నారు.

చేతివృత్తుల వారికి చేయూత : గ్రామీణ ఆర్థిక వ్యవస్థను బలోపేతం చేసే దిశగా, తేజస్వీ యాదవ్ మరిన్ని హామీలు ఇచ్చారు. రాష్ట్రంలోని క్షురకులు, కుమ్మరులు, వడ్రంగులకు రూ. 5 లక్షల వరకు వడ్డీ లేని రుణాలను అందిస్తామని తెలిపారు. దీని ద్వారా వారు ఆధునిక ఉపకరణాలు కొనుగోలు చేసి, స్వయం ఉపాధిలో నిలదొక్కుకోవచ్చని ఆయన పేర్కొన్నారు. అలాగే, ప్రజా పంపిణీ వ్యవస్థ (PDS) డీలర్లకు క్వింటాల్‌కు ఇచ్చే మార్జిన్ డబ్బును కూడా గణనీయంగా పెంచుతామని హామీ ఇచ్చారు.

ప్రస్తుత ప్రభుత్వంపై తీవ్ర విమర్శలు : ఈ సందర్భంగా తేజస్వీ యాదవ్, ప్రస్తుత ప్రభుత్వంపై తీవ్ర స్థాయిలో విరుచుకుపడ్డారు. ప్రజలు ప్రభుత్వ మార్పును కోరుకుంటున్నారని, తాము ఎక్కడికి వెళ్లినా ప్రజల నుంచి విశేష స్పందన లభిస్తోందని అన్నారు. “ఈ 20 ఏళ్ల దార్శనిక ప్రభుత్వంలో అవినీతి, నేరాలు తారాస్థాయికి చేరుకున్నాయి. భూమి లేకపోవడం వల్లే పరిశ్రమలు పెట్టలేకపోతున్నామని అమిత్ షా చెప్పడం వారి వైఫల్యానికి నిదర్శనం” అని విమర్శించారు. బీజేపీ వ్యూహాలను ప్రజలు అర్థం చేసుకున్నారని, ఈసారి ఎన్నికల్లో మార్పు ఖాయమని ధీమా వ్యక్తం చేశారు.

కొత్త బిహార్‌ కోసం మా పోరాటం : “ప్రజలు మాకు కేవలం 20 నెలలు అవకాశం ఇవ్వాలి. బిహార్‌ను అభివృద్ధి పథంలో నడిపిస్తాం. మార్పు వస్తుందనే పూర్తి నమ్మకం నాకుంది. మహాగఠ్‌బంధన్ ప్రభుత్వాన్ని ఏర్పాటు చేసి, కొత్త బిహార్‌ను నిర్మించడానికి కృషి చేస్తాం” అని తేజస్వీ తెలిపారు.

కాగా, రానున్న అసెంబ్లీ ఎన్నికలకు మహాగఠ్‌బంధన్ కూటమి తమ ముఖ్యమంత్రి అభ్యర్థిగా తేజస్వీ యాదవ్‌ను, ఉప ముఖ్యమంత్రి అభ్యర్థిగా వికాస్‌షీల్ ఇన్సాన్ పార్టీ (వీఐపీ) అధినేత ముకేశ్ సహానీని ప్రకటించింది. బిహార్‌లో నవంబర్ 6, 11 తేదీలలో రెండు దశల్లో ఎన్నికలు జరగనుండగా, నవంబర్ 14న ఓట్ల లెక్కింపు చేపట్టనున్నారు.