Unique wedding traditions in India : పెళ్లి బరాత్.. అంటే సాధారణంగా ఒకసారే ఉంటుంది. కానీ, బిహార్‌లోని ఓ సమాజంలో ఏకంగా ఐదు సార్లు వివాహ ఊరేగింపు నిర్వహిస్తారంటే నమ్ముతారా..? అవును, పూర్వీకులకు పిండ ప్రదానాలు చేయించడంలో ప్రసిద్ధి చెందిన ‘గయాపాల్ పాండాలు’, తమ పెళ్లిళ్లలో ఈ వింత, విలక్షణమైన ఆచారాన్ని శతాబ్దాలుగా పాటిస్తున్నారు. అసలు ఏమిటీ ఐదు ఊరేగింపుల కథ? ఈ సంప్రదాయం వెనుక ఉన్న ఆంతర్యమేంటి..?
ఎవరీ ‘గయాపాల్ పాండాలు’ : గయ క్షేత్రంలో పితృకర్మలు, పిండ ప్రదానాలు చేయించే పూజారులనే ‘గయాపాల్ పాండాలు’ అంటారు. వీరికి సమాజంలో ప్రత్యేక గుర్తింపు, గౌరవం ఉన్నాయి. తమకంటూ ప్రత్యేకమైన కట్టుబాట్లు, సంప్రదాయాలను పాటిస్తారు. అందులో భాగమే ఈ ఐదు ఊరేగింపుల వివాహ వేడుక.
ఐదు ఊరేగింపులు.. ఐదు ఘట్టాలు : ప్రతి ఊరేగింపు, వివాహంలోని ఓ కీలక ఘట్టానికి ప్రతీకగా నిలుస్తుంది.
దిఖౌని బరాత్ (తిలక్ ఊరేగింపు): పెళ్లిలో ఇదే మొదటి ఊరేగింపు. ‘టికా-తిలక్’ వేడుకలో భాగంగా, వరుడి వైపు వారు వధువు ఇంటికి ఊరేగింపుగా వెళ్తారు. ఈ సమయంలో వధువు కుటుంబం, వరుడికి బంగారం, వెండి, బట్టలు వంటివి బహూకరిస్తుంది.
జోడా బరాత్ (వస్త్రాల ఊరేగింపు): ఈసారి, వధువు తల్లిదండ్రులు బట్టలు, స్వీట్లు, పండ్లతో వరుడి ఇంటికి ఊరేగింపుగా వెళ్తారు. కనీసం 51 జతల బట్టలు, కిలోపావు బరువున్న ప్రత్యేకమైన లడ్డూను తప్పనిసరిగా తీసుకెళ్తారు.
ఆభరణాల ఊరేగింపు: మూడో ఊరేగింపులో, వరుడి కుటుంబం నగలు, బట్టలు, ఇతర బహుమతులతో వధువు ఇంటికి వెళ్తుంది. ఇందులో మహిళలు అధికంగా పాల్గొంటారు.
వివాహ ఊరేగింపు: ఇది అసలైన పెళ్లి ఊరేగింపు. ఇందులో వధూవరులతో పాటు, ఏనుగులు, గుర్రాలు, తోలుబొమ్మలు, కాగితపు బొమ్మలు కూడా పాల్గొనడం విశేషం.
వీడ్కోలు ఊరేగింపు: వధువుకు వీడ్కోలు పలికేందుకు (అప్పగింతలు), వరుడి వైపు నుంచి వందలాది మంది వధువు ఇంటికి ఊరేగింపుగా వెళ్తారు.
“కాలానికి అనుగుణంగా మారుతాం, కానీ మా సంస్కృతి, సంప్రదాయాలే మాకు అసలైన గుర్తింపు. వాటిని ఎప్పటికీ వదులుకోం.”
– నిరంజన్ కుమార్ ధోక్రీ, పాండా సమాజ ప్రతినిధి
వరకట్నం ఉండదు : ఈ సంప్రదాయంలో అత్యంత ఆసక్తికరమైన, ఆదర్శవంతమైన విషయం ఏమిటంటే, గయాపాల్ సమాజంలో చాలామంది వరకట్నాన్ని తీసుకోరు. దీనిని వధువు కుటుంబంపై భారంగా భావిస్తారు. వివాహాలు పూర్తిగా పరస్పర అంగీకారంతోనే జరుగుతాయి. ఒకవేళ వధువు కుటుంబం ఆర్థికంగా బలహీనంగా ఉంటే, వరుడి కుటుంబమే అన్ని ఏర్పాట్లు చేయడం ఇక్కడి ప్రత్యేకత.
కాలక్రమేణా, కొన్ని కుటుంబాలు ఊరేగింపుల సంఖ్యను రెండు లేదా మూడుకు తగ్గించుకుంటున్నా, నేటికీ ఈ సాంకేతిక యుగంలో కూడా, గయాపాల్ పాండాలు తమ విలక్షణమైన సంప్రదాయాలను భక్తిశ్రద్ధలతో పాటిస్తూ, తమ ప్రత్యేకతను చాటుకుంటున్నారు.
