India’s military preparedness : “భారత్ శాంతిని ప్రేమించే దేశం.. కానీ, దాన్ని మా బలహీనతగా పొరబడొద్దు!” అంటూ త్రివిధ దళాధిపతి (సీడీఎస్) జనరల్ అనిల్ చౌహాన్ శత్రుదేశాలకు పరోక్షంగా తీవ్ర హెచ్చరికలు జారీ చేశారు. శాంతి కావాలంటే యుద్ధానికి సిద్ధంగా ఉండాలన్న ప్రాచీన సూక్తిని గుర్తుచేస్తూ, అవసరమైతే ఎదురుదాడి చేయడానికి భారత్ సర్వసన్నద్ధంగా ఉందని ఆయన స్పష్టం చేశారు. మధ్యప్రదేశ్‌లో జరిగిన ఓ కార్యక్రమంలో ఆయన చేసిన ఈ వ్యాఖ్యలు దేశ రక్షణ వ్యూహంలో మారుతున్న దృక్పథానికి అద్దం పడుతున్నాయి. 

మారుతున్న ప్రపంచ భద్రతా పరిస్థితుల నేపథ్యంలో, భారత సైనిక సంసిద్ధతపై చీఫ్ ఆఫ్ డిఫెన్స్ స్టాఫ్ (సీడీఎస్) జనరల్ అనిల్ చౌహాన్ కీలక దిశానిర్దేశం చేశారు. 

శాంతి కావాలంటే.. యుద్ధానికి సిద్ధం : భారత్ ఎల్లప్పుడూ శాంతినే కోరుకుంటుందని, అయితే ఎల్లకాలం శాంతివాదులుగా ఉండలేమని జనరల్ చౌహాన్ తేల్చిచెప్పారు. “Si vis pacem, para bellum” అనే లాటిన్ సూక్తిని ఆయన ప్రస్తావించారు. దీని అర్థం, “మీరు శాంతిని కోరుకుంటే, యుద్ధానికి సిద్ధంగా ఉండండి”. మన శాంతికాముకతను అలుసుగా తీసుకుని కవ్వింపు చర్యలకు పాల్పడితే, పరిణామాలు తీవ్రంగా ఉంటాయని ఆయన పరోక్షంగా హెచ్చరించారు.

త్రివిధ దళాల సమన్వయం.. ఏకీకృత ప్రతిస్పందన : భవిష్యత్ యుద్ధభూమి స్వరూపం పూర్తిగా మారిపోతోందని సీడీఎస్ నొక్కిచెప్పారు. “భూమి, సముద్రం, గాలి మాత్రమే కాదు, సైబర్, అంతరిక్ష రంగాలు కూడా ఇకపై యుద్ధ క్షేత్రాలే. ఈ ఐదు రంగాల్లోనూ వేగంగా అభివృద్ధి చెందుతున్న తరుణంలో, మన ప్రతిస్పందన విడివిడిగా కాకుండా, ఏకీకృతంగా, వేగంగా, నిర్ణయాత్మకంగా ఉండాలి” అని ఆయన అన్నారు. భవిష్యత్ యుద్ధాలు ఏ ఒక్క దళానికో పరిమితం కావని, అందుకే త్రివిధ దళాల మధ్య ఉమ్మడి ఆలోచన, ఉమ్మడి ప్రణాళిక అత్యవసరమని ఆయన స్పష్టం చేశారు.

ఆలోచనల్లోనూ ‘ఆత్మనిర్భరత’ : ‘ఆత్మనిర్భర్ భారత్’ అంటే కేవలం ఆయుధాలు, సాంకేతికతను దేశీయంగా తయారుచేసుకోవడమే కాదని, మన ఆలోచనల్లో, సైనిక సిద్ధాంతాల్లో కూడా స్వతంత్రంగా ఉండాలని జనరల్ చౌహాన్ అభిప్రాయపడ్డారు. ‘వికసిత్ భారత్’ అనేది ‘శశాస్త్ర’ (ఆయుధ సంపన్నమైన), ‘సురక్షిత’ (సురక్షితమైన), ‘ఆత్మనిర్భర్’ (స్వావలంబన కలిగిన) దేశంగా ఉండాలని ఆయన ఆకాంక్షించారు.

కొనసాగుతున్న ‘ఆపరేషన్ సిందూర్’ : ఇటీవల పాకిస్థాన్‌తో జరిగిన ఘర్షణ, ‘ఆపరేషన్ సిందూర్’ నుంచి భారత్ విలువైన పాఠాలు నేర్చుకుందని సీడీఎస్ తెలిపారు. ఆ ఆపరేషన్ ఇప్పటికీ కొనసాగుతోందని పునరుద్ఘాటించడం ద్వారా, సరిహద్దుల్లో ఉగ్రవాదంపై ఉక్కుపాదం మోపడంలో ప్రభుత్వం ఎంత దృఢంగా ఉందో చెప్పకనే చెప్పారు. ఆ ఘర్షణ నుంచి నేర్చుకున్న పాఠాలను ఇప్పటికే అమలులో పెట్టామని, భవిష్యత్ సవాళ్లను ఎదుర్కొనేందుకు అవి దోహదపడతాయని ఆయన ధీమా వ్యక్తం చేశారు.