DGCA Notice To Air India: విమానయాన రంగంలో సంచలనం. టాటా గ్రూప్ చేతికి వచ్చాక ప్రగతి పథంలో పయనిస్తుందనుకున్న ఎయిరిండియాకు పౌర విమానయాన డైరెక్టరేట్ జనరల్ (డీజీసీఏ) గట్టి షాకిచ్చింది. ప్రయాణికుల భద్రత, సిబ్బంది సంక్షేమం విషయంలో ఏమాత్రం ఉపేక్షించబోమని డీజీసీఏ మరోసారి నిరూపించింది. ప్రముఖ విమానయాన సంస్థ ఎయిరిండియా, తమ నిబంధనలను యథేచ్ఛగా ఉల్లంఘించిందంటూ ఏకంగా నాలుగు షోకాజ్ నోటీసులు జారీ చేయడం పరిశ్రమ వర్గాల్లో కలకలం రేపుతోంది. క్యాబిన్ సిబ్బంది విశ్రాంతి, వారి విధి గంటలు, శిక్షణ ప్రమాణాలు వంటి కీలకమైన అంశాల్లో ఎయిరిండియా నిర్లక్ష్యంగా వ్యవహరించిందని డీజీసీఏ ప్రాథమికంగా గుర్తించింది. అసలు ఎయిరిండియా చేసిన తప్పిదాలేంటి..? డీజీసీఏ ఎందుకు ఇంత కఠినంగా వ్యవహరించింది..?
వివరాల్లోకి వెళితే:
ఎయిరిండియా స్వచ్ఛందంగా సమర్పించిన భద్రతా నివేదికల ఆధారంగానే డీజీసీఏ ఈ చర్యలు తీసుకోవడం గమనార్హం. జూన్ 20, 21 తేదీల్లో ఎయిరిండియా ఇచ్చిన సమాచారాన్ని క్షుణ్ణంగా పరిశీలించిన డీజీసీఏ, జులై 23న ఈ షోకాజ్ నోటీసులను జారీ చేసింది. సిబ్బంది, ప్రయాణికుల భద్రతకు అత్యంత ప్రాధాన్యతనివ్వాల్సిన విమానయాన సంస్థ, పలు సందర్భాల్లో నిబంధనలను గాలికొదిలేసిందని ఈ నోటీసులు స్పష్టం చేస్తున్నాయి.
డీజీసీఏ నోటీసుల్లో ఏముంది : డీజీసీఏ జారీ చేసిన నాలుగు నోటీసులలో ప్రధానంగా ఈ క్రింది ఉల్లంఘనలను ప్రస్తావించినట్లు విశ్వసనీయ వర్గాలు తెలిపాయి.
విశ్రాంతి లేని ప్రయాణాలు: ముఖ్యంగా సుదూర ప్రాంతాలకు వెళ్లే (ఆల్ట్రా లాంగ్ హాల్) విమానాలలో క్యాబిన్ సిబ్బందికి ఇవ్వాల్సిన కనీస విశ్రాంతి నిబంధనలను ఉల్లంఘించారు. ఏప్రిల్ 27, ఏప్రిల్ 28, మే 2 తేదీల్లో నడిపిన నాలుగు విమానాల్లో ఈ ఉల్లంఘనలు జరిగినట్లు గుర్తించారు.
శిక్షణలో లోపాలు: జులై 26, అక్టోబర్ 9 (2024), ఏప్రిల్ 22 (2025) తేదీల్లోని విమానాలకు సంబంధించిన సిబ్బంది శిక్షణ, కార్యాచరణ విధానాల్లో తీవ్రమైన లోపాలు ఉన్నట్లు డీజీసీఏ పేర్కొంది.
ALSO READ: https://teluguprabha.net/national-news/passenger-gives-birth-to-baby-boy-onboard-air-india-express/
విధి గంటల ఉల్లంఘన: జూన్ 24 (2024), జూన్ 13 (2025) తేదీల్లో నడిపిన విమానాలకు సంబంధించి ఫ్లైట్ డ్యూటీ పీరియడ్, వారపు విశ్రాంతి నిబంధనలను కూడా ఉల్లంఘించినట్లు నోటీసులో తెలిపారు.
పునరావృతమవుతున్న తప్పిదాలు: ఫిబ్రవరి 16, ఏప్రిల్ 10-11, మే 19, డిసెంబర్ 1 (2024) తేదీల్లో నడిపిన విమానాల్లో కూడా క్యాబిన్ సిబ్బంది శిక్షణకు సంబంధించిన ఉల్లంఘనలు పునరావృతమైనట్లు డీజీసీఏ గుర్తించింది.
స్పందించిన ఎయిరిండియా:
డీజీసీఏ నోటీసులపై ఎయిరిండియా అధికార ప్రతినిధి స్పందించారు. “డీజీసీఏ జారీ చేసిన నోటీసులు మాకు అందాయి. వాటిని పరిశీలించి, నిర్ణీత గడువులోగా మా వివరణను సమర్పిస్తాము. మా సిబ్బంది, ప్రయాణికుల భద్రతకే మా ప్రథమ ప్రాధాన్యత,” అని ఆయన ఒక ప్రకటనలో తెలిపారు.
