High Court Questions Delhi Govt Transgender Reservation: ప్రభుత్వ ఉద్యోగాలలో ట్రాన్స్‌జెండర్ (Transgender) వర్గానికి రిజర్వేషన్లు అమలు చేయడంలో జాప్యంపై ఢిల్లీ హైకోర్టు సోమవారం ఢిల్లీ ప్రభుత్వంపై తీవ్ర అభ్యంతరం వ్యక్తం చేసింది. ఈ విషయంలో ప్రభుత్వం వైఫల్యం చెందిందని పేర్కొంటూ, ఒక వ్యక్తి దాఖలు చేసిన రిట్ పిటిషన్‌ను విస్తృత ప్రజా ప్రయోజన వ్యాజ్యం (PIL)గా మార్చింది.

ప్రభుత్వ ఉద్యోగాల్లో ట్రాన్స్‌జెండర్లకు వయోపరిమితి, అర్హత మార్కుల్లో సడలింపులు కల్పిస్తూ 2021లో జారీ చేసిన నోటిఫికేషన్‌కు అనుగుణంగా, వారికి ప్రయోజనాలు కల్పించేందుకు 10 రోజుల్లోగా తగిన నిర్ణయం తీసుకోవాలని ఢిల్లీ ప్రభుత్వాన్ని హైకోర్టు ఆదేశించింది.

ALSO READ: Supreme Court: ఫుట్‌పాత్‌లు, హెల్మెట్లు, హెడ్‌లైట్లు.. రహదారి భద్రతపై సుప్రీంకోర్టు చారిత్రక ఆదేశాలు

ముఖ్య న్యాయమూర్తి దేవేంద్ర కుమార్ ఉపాధ్యాయ, జస్టిస్ తుషార్ రావు గెడెల నేతృత్వంలోని ధర్మాసనం, హైకోర్టులో కోర్ట్ అటెండెంట్ పోస్టుల నియామకం కోసం రిజర్వేషన్ కోరుతూ ఒక ట్రాన్స్‌జెండర్ దాఖలు చేసిన పిటిషన్‌పై విచారణ జరిపింది.

2014 సుప్రీంకోర్టు తీర్పు అమలులో వైఫల్యం

నల్సా (NALSA) కేసులో సుప్రీంకోర్టు 2014లోనే తీర్పునిస్తూ, ప్రభుత్వ ఉద్యోగాల కోసం ట్రాన్స్‌జెండర్‌లను సామాజికంగా, విద్యాపరంగా వెనుకబడిన వర్గంగా (socially and educationally backward category) పరిగణించాలని ప్రభుత్వాలకు ఆదేశించింది. “అయితే, ఇప్పటివరకు ప్రభుత్వ ఉద్యోగాల విషయంలో అలాంటి విధానపరమైన నిర్ణయం తీసుకున్నట్లు కనిపించడం లేదు,” అని హైకోర్టు ధర్మాసనం అభిప్రాయపడింది.

రిజర్వేషన్లు ఇవ్వడంలో వైఫల్యం చెందడమే కాకుండా, 2021 నాటి నోటిఫికేషన్ ప్రకారం ఇవ్వాల్సిన వయస్సులో ఐదేళ్ల సడలింపు, అర్హత మార్కుల్లో 5 శాతం సడలింపు కూడా ట్రాన్స్‌జెండర్లకు అందుబాటులోకి రాలేదని కోర్టు దృష్టికి వచ్చింది.

ALSO READ: Indian Railways: ఇకపై బుక్ చేసిన టికెట్ల ప్రయాణ తేదీని మార్చుకోవచ్చు.. రైల్వే చరిత్రలో తొలిసారి..

“రిజర్వేషన్లు కల్పించకపోవడం వల్ల, ఆ సడలింపులు అందుబాటులో లేకపోవడం వల్ల చాలా మంది ట్రాన్స్‌జెండర్ వ్యక్తులు దరఖాస్తు చేసుకోలేకపోయారు,” అని ధర్మాసనం ఆందోళన వ్యక్తం చేసింది. ఈ నేపథ్యంలో, 2021 నాటి నోటిఫికేషన్ ప్రకారం ట్రాన్స్‌జెండర్లకు ప్రయోజనాలు కల్పించేందుకు హైకోర్టుతో సంప్రదించి 10 రోజుల్లోగా తగిన నిర్ణయం తీసుకోవాలని ఢిల్లీ ప్రభుత్వాన్ని ఆదేశించింది. ఒకవేళ సడలింపులు ఇస్తే, దరఖాస్తు సమర్పించడానికి చివరి తేదీని ఒక నెల పొడిగించాలని కూడా కోర్టు స్పష్టం చేసింది.

ALSO READ: Engagement Cancelled: మెనూలో మటన్ బిర్యానీ, ఫ్రైడ్ ఫిష్ లేదని నిశ్చితార్థం రద్దు చేసుకున్న వరుడు